"გოგაშვილმა თითი დამიქნია, კარგად იცი რა ხდებაო"- თემირლანი მაჩალიკაშვილის ოჯახი სუს-ს უდანაშაულობის პრეზუმპციის დარღვევაში ადანაშაულებს

პოლიტიკა - 11:51, 15 Jan, 2019

1063

თბილისის საქალაქო სასამართლოში პანკისის ხეობაში ჩატარებული სპეცოპერაციის შედეგად გარდაცვლილი თემირლან მაჩალიკაშვილის ოჯახის სარჩელის განხილვა მიმდინარეობს.

მაჩალიკაშვილის ოჯახი სუს-ს თემირლანის მიმართ „უდანაშაულობის პრეზუმპციის დარღვევას“ ედავება.

სასამართლოს წინაშე მოკლული ბიჭის დედა აიზა (მედიკო) მარგოშვილი წარსდგა და თქვა, რომ მის შვილს "ტერორისტებთან კავშირი არ ჰქონია".

"თემირლანი, რომ სუნთქავდა, ამით იყო ტერორისტი? ხალხში, რომ გავდივარ უცხოდ ვგრძნობ თავს, სხვა თვალით მიყურებენ, ალბათ, როგორც ტერორისტის დედას, როცა არანაირი ბრალი არ გვაქვს"- მიმართა მარგოშვილმა სასამართლოს.

მოკლული ახალგაზრდა ამბობს, რომ თემირლანმა იმ ადამიანების ნამდვილი სახელიც კი არ იცოდა, ვისთანაც კავშირს ედავებიან.

„თუ ესენი ტერორისტები იყვნენ, ამ 2 წლის განმავლობაში რატომ დადიოდნენ თავისუფლად? ნუთუ სამართალდამცავებმა არ იცოდნენ თბილისის ცენტრში, ხეობაში თავისუფლად, რომ გადაადგილდებოდნენ? ჩემ გულუბრყვილო ბავშვს უნდა ამოეცნო ისინი ვინ იყვნენ? მათი ნამდვილი სახელები და გვარები არ იცოდა ისე წავიდა ამ ქვეყნიდან", - განაცხადა მარგოშვილმა.

შვილმოკლული დედის განცხადებით, სპეცოპერაციის ღამეს გოგაშვილმა მას თითი დაუქნია.

„მომიახლოვდა გოგაშვილი და მკითხა, სტუმრები ვინ გყავდათო, მაშინ არც ვიცოდი გოგაშვილი ვინ იყო. სტუმრები სულ მყავს-მეთქი ვუთხარი, თითი დამიქნია, ძალიან კარგად იცი, რა ხდებაო..."- თქვა მარგოშვილმა.

მისი თქმით, თემირლანი ტერორისტად ყოველგვარი მტკიცებულების გარეშე გამოაცხადეს.

„მტკიცებულების გარეშე, პირდაპირ ტერორისტებთან დააკავშირეს ჩემი შვილი. თუ სწამთ ღმერთი და ადამიანობის ერთი პროცენტი თუ შერჩენიათ, ეყოთ ამდენი უსამართლობა, ამდენი არაადამიანური ბრალდება და ცილისწამება. ღმერთის წყალობით, მგონი გავიმარჯვებთ და დამტკიცდება თემირლანის უდანაშაულობა", - განაცხადა მარგოშვილმა.