"ეს უკავშირდება საარჩევნო შედეგებს და "ქართული ოცნების" მიერ განცდილ მარცხს"- ოპოზიცია სუს-ში საკადრო ცვლილებებზე

პოლიტიკა - 09:50, 15 Jan, 2019

1197

სახელმწიფო უსაფრთხოების სამსახურში მიმდინარე პროცესებს და საკადრო წმენდას ოპოზიცია გიორგი გახარიასა და ბიძინა ივანიშვილს უკავშირებს. ოპოზიციის აზრით მას შემდეგ რაც არჩევნების პირველ ტურში ხელისუფლებისთვის არასახარბიელო შედეგი დადგა, ივანიშვილმა გადაწყვიტა ყველა ის პირი მოიშოროს, ვინც „დავალება“ სათანადოდ ვერ შეასრულა. ერთ-ერთი ასეთი უწყება კი სუსია. გომელაურის უწყებამ ივანიშვილს არჩევნების შედეგების გათვალისწინებით იმედები გაუცრუა:

„ის მართლაც უკავშირდება საარჩევნო შედეგებს და "ქართული ოცნების" მიერ განცდილ მარცხს. ბატონი ხოჯევანიშვილის გადაყვანა სუს-ის მოადგილედ, ამ საკადრო გადაადგილებას, ისევე როგორც სხვა საკადრო ცვლილებებს „ქართული ოცნების“ ხელისუფლებაში არსებითი მნიშვნელობა არ აქვს. არ იცვლება მთავარი, ყველა სახელმწიფო უწყებას განაგებს ბატონი ივანიშვილი და სამწუხაროდ ის ყველა ამ უწყებას განაგებს საკუთარი ინტერესების შესაბამისად,“-განაცხადა „ევროპული საქართველოს“ წევრმა ირაკლი აბესაძემ.

ერთიანი ნაციონალური მოძრაობის წევრის კოტე იოსელიანის თქმით, „ქართული ოცნება“ სახელმწიფო უსაფრთხოების სამსახურს პოლიტიკური ზეწოლის იარაღად იყენებს, მიმდინარე ცვლილებები კი სხვა არაფერია თუ არა ერთი კლანის მმართველობიდან, მეორე კლანის მმართველობაში გადასვლა.

„მუდმივად ვართ იმ პროცესის მოწმენი, როდესაც კლანიდან კლანს გადაეცემა ესა თუ ის მნიშვნელოვანი თანამდებობა. რომელი კლანი გაძლიერდება სუს-ში, ამას არანაირი მნიშვნელობა არ აქვს, იმიტომ, რომ სუს-ი არის პირადად ბიძინა ივანიშვილის ერთ-ერთი მნიშვნელოვანი მექანიზმი, რომლითაც იგი მართავს, როგორც ქართულ ოცნებას, ასევე საარჩევნო პროცესებს და ყველა მისთვის პრობლემატურ საკითხს, რომელიც მას ქვეყნის ერთპიროვნულ და არაფორმალურ მმართველობაში უშლის ხელს.“- აცხადებს კოტე იოსელიანი.

გავრცელებული ინფორმაციით, სუს-ში ყველა რეგიონული სამსახურის უფროსი იცვლება და საკადრო გადაადგილებები სხვა თანამშრომლებსაც ეხებათ. არსებული ინფორმაციით, საკადრო წმენდის კიდევ ერთი მიზეზი სუს-ში ძალთა ახალი გადანაწილებისთვის ბრძოლაა, რასაც სავარაუდოდ სოსო გოგაშვილის კადრები ეწირებიან.