უზენაესი სასამართლოს მოსამართლეების შერჩევა - ანა დოლიძე და ნაზი ჯანეზაშვილი პარლამენტს ინიციატივით მიმართავენ

პოლიტიკა - 10:14, 15 Jan, 2019

843

უზენაესი სასამართლოს მოსამართლეების შერჩევის კრიტერიუმები და პროცედურები - იუსტიციის საბჭოს არამოსამართლე წევრები პარლამენტს ინიციატივით მიმართავენ. ანა დოლიძისა და ნაზი ჯანეზაშვილის ინიციატივა საკანონმდებლო ორგანოძი ოფიციალურად ხვალ შევა. მათი განცხადებით, ერთ-ერთი მთავარი საკითხი შერჩევის პროცესის გამჭვირვალება იქნება:

„ეს ბრძოლა გაგრძელდება ხვალ. ჩვენ გადავდივართ ახალ ეტაპზე. ახალ პროცედურულ ცვლილებებს წარვუდგენთ საქართველოს პარლამენტს. არ ეგონოს ირაკლი კობახიძეს, რომ შექმნის რაღაც სამუშაო ჯგუფს, დახურავს კარებს და როგორც გადაწერა კონსტიტუცია, ესე ჩუმად გადაწერს შესაბამის კანონმდებლობას. მას ეს აღარ გამოუვა. ჩვენ საკანონმდებლო წინადადებებს შევიტანთ და მოუწევს საქართველოს პარლამენტს მათი განხილვა,“ - განაცხადა ანა დოლიძემ.

ნაზი ჯანეზაშვილი აცხადებს, რომ მოსამართლეთა შერჩევისას კონკურსის გამოცხადება მნიშვნელოვანია:

„წინადადება მოიცავს რამდენიმე ძირითად ასპექტს. პირველი გახლავთ ის, რომ აუცილებლად გამოცხადდეს კონკურსი, მეორე, აუცილებელი და მნიშვნელოვანია, რომ შეიქმნას დამცავი მექანიზმი იმისა, რომ საბჭომ ვიდრე კანდიდატურებს შეარჩევს, იქამდე მოხდეს გადარჩევა ამ კანდიდატურებისა იმ ფორმით, რომ არ მოხვდნენ მასში საეჭვო რეპუტაციის და ისეთი ადამიანები, რომლებიც არ იმსახურებენ უზენაესი სასამართლოს მოსამართლეობას. ძალიან მნიშვნელოვანია, რომ ინტერესთა კონფლიქტის მექანიზმები იქნას გაწერილი და დახვეწილი, იმისათვის, რომ საბჭოს წევრები თავად არ მონაწილეობდნენ ამ პროცესში და თავად არ იყვნენ კანდიდატურები,“ - განაცხადა ნაზი ჯანეზაშვილმა.