თელავში, კულტურისა და დასვენების პარკი "ნადიკვარი" დააზიანეს. დამტვრეულია ტერასები, ჩამსხვრეული და დაბზარულია შუშის მოაჯირები, განადგურებულია ამფითეატრის იატაკი და ეზოში არსებული სკამები.

თელავის მერიაში აცხადებენ, რომ პარკი ვანდალებმა სხვადასხვა დროს დააზიანეს და მიმდინარე წელს მისი ინფრასტრუქტურის აღდგენა მოხდება.

„სამწუხაროდ, ასეთი ვანდალური შემთხვევები გვაქვს, რომლის დროსაც, მოსახლეობა, სამწუხაროდ, აზიანებს, არა მხოლოდ ნადიკვარზე, ქალაქის და მთლიანად მუნიციპალიტეტის ტერიტორიაზე სხვადასხვა ადგილს... სეზონისთვის ნადიკვარი უკვე სრულად შეხვდება გამართული,“ - ამბობს თელავის მუნიციპალიტეტის მერი, შოთა ნარეკლიშვილი.

ადგილობრივები დასასვენებელ პარკში სათვალთვალო კამერების დამონტაჟებას ითხოვენ.