კახა კალაძემ საერთაშორისო ფორუმი „ენერგია მდგრადი განვითარებისთვის“ გახსნა

ბიზნესი & ეკონომიკა - 14:13, 17 Sep, 2013

2481

ფორუმი საქართველოს მთავრობის, გაეროს კომისიის ევროპის ეკონომიკურ საკითხებში (UNEჩE), გაეროს კომისიის აზიისა და წყნარი ოკეანეს რეგიონის ეკონომიკურ და სოციალური საკითხებში (EშჩAP) და გაეროს განვითარების პროგრამის (UNDP) ორგანიზებით იმართება. ფორუმში 25 ქვეყნიდან 200 დელეგატი მონაწილეობს.

ფორუმის ფარგლებში გაიმართება მსჯელობა პოლიტიკურ და საკანონმდებლო საკითხებზე, რომელიც განაპირობებს ენერგოეფექტურობის გაუმჯობესებას და სუფთა ენერგიის ხელმისაწვდომობას შენობებსა და ინფრასტრუქტურაში. მონაწილეები იმსჯელებენ, თუ რა არის საჭირო ენერგოეფექტურობასა და სუფთა ენერგიაში ინვესტირების წასახალისებლად, განიხილავენ ევროპისა და აზიის რეგიონების გამოცდილებას.

როგორც ენერგეტიკის მინისტრმა განაცხადა, სამინისტროს დღის წესრიგში დგას ქვეყნის ენერგეტიკული განვითარების სტრატეგიის, ქვეყნის ენერგეტიკული უსაფრთხოების სტრატეგიის, ენერგოეფექტურობისა და განახლებადი ენერგიების შესახებ კანონის მომზადება. „ჩვენ უკვე გავაკეთეთ განაცხადი სრულუფლებიან წევრობაზე ორგანიზაციაში “ენერგეტიკული გაერთიანება”, რაც იმას ნიშნავს, რომ მომავალი წლების განმავლობაში ეტაპობრივად მოხდება ჩვენი კანონმდებლობისა და ნორმატიული ბაზის ევროპის ენერგეტიკულ კანონმდებლობასთან დაახლოება“, - აღნიშნა კახა კალაძემ.

მეოთხე საერთაშორისო ფორუმი დღეს გაიხსნა და 19 სექტემბერს დაიხურება.