ოპოზიცია შიშობს, რომ ცილისწამებისა და შეურაცხყოფის შესახებ კანონს ხელისუფლება განსხვავებული აზრის შესაზღუდად გამოიყენებს

პოლიტიკა - 16:35, 12 Jan, 2019

830

სალომე ზურაბიშვილის მიერ ცილისწამების შესახებ კანონთან დაკავშირებით გაჟღერებულ ინიციატივაში ოპოზიცია სიტყვის თავისუფლების შეზღუდვის საშიშროებას ხედავს.

ხელისუფლების ოპონენტები შიშობენ, რომ მმართველი გუნდი ცილისწამებისა და შეურაცხყოფის შესახებ კანონს განსხვავებული აზრის შესაზღუდად გამოიყენებს.

„საქართველოს კანონმდებლობით დაწესებულია სიტყვის თავისუფლების საკმაოდ მაღალი სტანდარტი. ამით გამოირჩეოდა საქართველო, როგორც აღმოსავლეთ ევროპის, ასევე პოსტსაბჭოთა ქვეყნებიდან. შესაბამისად, უკვე დაგეგმილი პიარი იმისა, რომ შეიცვალოს კანონმდებლობა და გარკვეული რეგულაციები დაწესდეს ამ თვალსაზრისით. ვხედავთ, რომ საზოგადოების შემზადება ხდება. პრაქტიკულად, ეს ხელისუფლებას გადაწყვეტილი აქვს და ორკესტრირებულად მიმდინარეობს ეს პიარკამპანია,“ - განაცხადა ნაციონალური მოძრაობის წევრმა, ლევან ბეჟაშვილმა.

ოთარ კახიძე დარწმუნებულია, რომ ზურაბიშვილმა მმართველი გუნდის სურვილი გაახმოვანა:

„პრეზიდენტისგან ასეთი სიგნალი, რა თქმა უნდა, საგანგაშოა. ის, როგორც წესი, ახმოვანებს იმ გზავნილებს, რომელიც აქვს მის მმართველ გუნდს, ვისაც წარმოადგენდა, ვინც უზრუნველყო უკანონო მეთოდებით მისი გამარჯვება. ამიტომ, ამ სიგნალს საზოგადოება ყურადღებით უნდა მოეკიდოს, რადგან ჩვენ არ უნდა დავუშვათ სიტყვის თავისუფლების შეზღუდვა. როგორც წესი, ამ ყველაფერს ხელისუფლება აკეთებს ხოლმე იმისთვის, რომ მისთვის არასასურველი აზრი შეზღუდოს,“ - განაცხადა ევროპული საქართველოს წევრმა, ოთარ კახიძემ.

საქართველოს პრეზიდენტი ცილისწამების წინააღმდეგ კანონის მიღებისთვის მუშაობის დაწყებას აპირებს.