„მოსამართლეთა 10-კაციანი სია არ გადის კენჭისყრაზე, მაგრამ არ უნდა მოვტყუვდეთ, რათა არ მივიღოთ ისევ ჩინჩალაძე, გვრიტიშვილი და მიქაუტაძე“- ნაზი ჯანეზაშვილი

პოლიტიკა - 15:16, 12 Jan, 2019

491

"შუალედური გამარჯვება" - ასე აფასებს იუსტიციის უმაღლესი საბჭოს არამოსამართლე წევრი ნაზი ჯანეზაშვილი ირაკლი კობახიძის განცხადებას, რომელმაც გიორგი მიქაუტაძესთან შეხვედრის შემდეგ გაახმოვანა და თქვა, რომ მოსამართლეთა შერჩევის კრიტერიუმები შემუშავდება, რასაც ექნება უკუძალა და სწორედ ამ კრიტერიუმების მიხედვით იქნება წარდგენილი განახლებული სია.

"ეს არის შუალედური გამარჯვება, რადგან ცხადია, რომ მოსამართლეთა ათკაციანი სია ამ ფორმით აღარ გადის კენჭისყრაზე, მაგრამ არ უნდა მოვტყუვდეთ, რათა არ მივიღოთ ისევ მიხეილ ჩინჩალაძე, დიმიტრი გვრიტიშვილი და გიორგი მიქაუტაძე - მნიშვნელოვანია ერთობლივი მუშაობა გავაგრძელოთ"- აცხადებს ჯანეზაშვილი.

არამოსამართლე წევრი ამბობს, რომ მიქაუტაძე და გვრიტიშვილი არ უნდა იყვნენ კანდიდატები, რადგან ისინი არიან საბჭოს წევრები, რაც ინტერესთა კონფლიქტია.

„აუცილებლად უნდა გამოცხადდეს კონკურსი, კონკურსის გარეშე შერჩეული კანდიდატურები და ამ ფორმით დასახელებული კანდიდატურები, ბუნებრივია, სანდო ვერასოდეს ვერ იქნება. მეორე, აუცილებელია და საჭიროა, რომ შეიქმნას ფილტრი, ვიდრე იუსტიციის უმაღლესი საბჭო შეარჩევს კანდიდატურებს, აუცილებლად შეიქმნას იმ კანდიდატურების გადარჩევის ფილტრი, რომელებიც მიმართავენ. მე და ანა დოლიძე უახლოეს მომავალში ერთად შევთავაზებთ სქემას. გარდა ამისა, მნიშვნელოვანია, რომ ინტერესთა კონფლიქის სტანდარტები შემუშავდეს. მე მიმაჩნია, რომ გიორგი მიქაუტაძე და გვრიტიშვილი არ უნდა იყვნენ კანდიდატურები, რადგან ისინი არიან საბჭოს წევრები, რადგან ისინი წარმოადგენენ ორგანოს, რომელიც ახდენს ნომინირებას კანდიდატურებისა და აქ არის ინტერესთა კონფლიქტი ფართო გაგებით"- თქვა მან.