საქართველოს მეხუთე პრეზიდენტი სალომე ზურაბიშვილი პრესკონფერენციას მართავს, რომლის ფარგლებშიც მან აღნიშნა, რომ ცილისწამების წინააღმდეგ კანონის მიღებასთან დაკავშირებით მუშაობის დაწყებას გეგმავს.

პრეზიდენტის თქმით, ის აპირებს აღნიშნული ინიციატივით მიმართოს მთავრობასა და პარლამენტს:

"პრეზიდენტს არ გააჩნია საკანონმდებლო ინიციატივის უფლება, ეს არ ნიშნავს, რომ პრეზიდენტს არ აქვს უფლება ჰქონდეს მოსაზრება, მორალური ინიციატივა, რომელიმე თემა აწიოს და მიმართოს, მთავრობას, კანონმდებლებს საზოგადოებას.

ეს არის თემა, რომელიც აწუხებს საზოგადოებას, საჭირო არის ამის დაწყნარება, მე მესმის რომ ამავე დროს დაცული უნდა იყოს სიტყვის თავისუფლება, მაგრამ არსებობს ქვეყნები ვინც ეს გადაწყვიტეს, ბოლო ამის მაგალითი იყო საფრანგეთი, რომელმაც მიიღო ასეთი კანონი ცილისწამების წინააღმდეგ, მაგრამ საკონსტიტუციო სასამართლომაც დაამტკიცა, რომ ეს არ მოდიოდა წინააღმდეგობაში არც სიტყვის თავისუფლებასთან - ამაზე უნდა ვიმუშაოთ.

პრეზიდენტის ადმინისტრაცია მზად არის, რომ საზოგადოებასთან არასამთავრობოებთან ამ თემაზე ჰქონდეს დისკუსია და ეს გამოვიყენოთ შემდეგ, როცა საკანონმდებლო ორგანოსთან იქნება განხილვა,"-განაცხადა სალომე ზურაბიშვილმა.