მოსამართლეთა სიასთან დაკავშირებით ბიძინა ივანიშვილის განცხადებას და გუნდის წევრების კრიტიკას პარლამენტის ფრაქცია „ქართული ოცნება - სოციალ-დემოკრატების“ თავმჯდომარის მოადგილე, ბექა ნაცვლიშვილი ეხმაურება.

ნაცვლიშვილი აღნიშნავს, რომ მოსამართლეთა სიასთან დაკავშირებით დიალოგის გამართვა აუცილებელია. თუმცა, რამდენიმე დღის წინ ნაცვლიშვილს გაცილებით მკაცრი პოზიცია ჰქონდა და ამბობდა, რომ მოსამართლეთა სიის დამტკიცების შემთხვევაში ის საპარლამენტო უმრავლესობის შემადგენლობას დატოვებდა.

„მნიშვნელოვანია ჩემი აზრით, რომ ჩვენმა ღიად გამოთქმულმა პოზიციამ ამ საკითხთან დაკავშირებით გარკვეული თვალსაზრისით უბიძგა გუნდს მსჯელობისკენ. მიუხედავად იმისა, რომ აქ ითქვა, რომ გარკვეული თვალსაზრისით თითქოს რიგმა დეპუტატებმა მოვახდინეთ ამ საკითხის პოლიტიკური ქულებისთვისჩაწერის მიზნით ინსტრუმენტალიზაცია, მე პირადად მიმაჩნია, რომ ასეთ საკითხზე ღიად და საჯაროდ უნდა გამეკეთებინა მყისიერი რეაგირება და ამიტომ გავაკეთე ეს. ეს თუ გარკვეული თვალსაზრისით გახდა ინდიკატორი იმისა, რომ უფრო მეტად და ინტენსიურად დავფიქრებულიყავით ამ საკითხზე, ეს არის ძალიან კარგი,“ - განაცხადა ნაცვლიშვილმა.

ბიძინა ივანიშვილმა უზენაესი სასამართლოს მოსამართლეების არჩევასა და გუნდში არსებულ დაპირისპირებაზე დღეს სპეციალური მიმართვა გაავრცელა.

ივანიშვილმა ეკა ბესელია გუნდის წინააღმდეგ წასვლაში დაადანაშაულა.

თავის მხრივ ეკა ბესელია ექსპრემიერს "ყველაფრისთვის ნათელის მოფენით" დაემუქრა.