„თიბისი ბანკის“ წინააღმდეგ მიმდინარე გამოძიება - არასამთავრობო სექტორს კითხვები აქვს. „საქართველოს დემოკრატიული ინიციატივის“ თავმჯდომარე აცხადებს, რომ ბოლო დროს მამუკა ხაზარაძე ბიძინა ივანიშვილის ინტერესების ეპიცენტრში მოექცა:

„ბატონი ივანიშვილის ყურადღების ეპიცენტრში რამდენჯერმე მოექცა ბატონი ხაზარაძე და მისი ბიზნესი და ამას თან დაერთო პროკურატურის მხრიდან ისეთი საგამოძიებო მოქმედების წარმოება, რომელიც დაკავშირებულია შესაძლოა სამართალდარღვევებთან, რომელსაც ადგილი ჰქონოდა 10 წლის წინ, ბუნებრივია სამართლიანად აღძრავს ეჭვებს, რომ ეს არის სინამდვილეში არა მართლმსაჯულების ინტერესებიდან მომდინარე გამოძიება, არამედ ეს არის პროცესი, რომელიც მიმართული არის კონკრეტული ბიზნესის და კონკრეტული ბიზნესმენის წინააღმდეგ. ამ კითხვებზე პასუხი შესაძლებელია გვქონდეს მას შემდეგ, როდესც მოვისმენთ დასაბუთებულ პოზიციას ხელისუფლების. რა გარდაუვალი აუცილებლობით იქნა გამოძიების დაწყება განპირობებული და რა შედეგებს მოგვიტანს მათ შორის ეს გამოძიება. ჯერ რასაც ვხედავთ ეს არის ერთი კონკრეტული ბიზნესის რეპუტაციის შელახვა და საკმაოდ დიდი რისკის ქვეშ დაყენება საბანკო სექტორის,“-განაცხადა გიორგი მშვენიერიძემ.