"ალბათ ასეთი პოზიციებით ჩვენ გუნდში ერთად ვერ დავრჩებით"- ივანიშვილის ღია კრიტიკის შემდეგ ბესელიას თანაგუნდელები დაუპირისპირდნენ

პოლიტიკა - 15:09, 10 Jan, 2019

1694

ბიძინა ივანიშვილის კრიტიკული წერილის მიუხედავად საპარლამენტო უმრავლესობის წევრები აცხადებენ, რომ ეკა ბესელიას გუნდიდან გარიცხვის საკითხი არ განხილულა.

თუმცა, გია ვოლსკი ამბობს, რომ დაპირისპირებული მხარეები ერთ გუნდში ვერ დარჩებიან.

„გარიცხვა ცუდი სიტყვაა, ალბათ ასეთი პოზიციებით ჩვენ გუნდში ერთად ვერ დავრჩებით. როგორი ფორმით მოხდება დაცილება ამას მომავალი გვიჩვენებს. ვფიქრობ შეცდომაა და ამ შეცდომაზე ღიად უნდა ვისაუბროთ ერთმა მხარემაც და მეორემაც,“-აცხადებს გია ვოლსკი.

გიორგი კახიანი ამბობს, რომ თუ როგორ გადაიჭრება გუნდში დაწყებული დაპირისპირება დიდწილად ეკა ბესელიაზეა დამოკიდებული.

„არასდროს, არაცერთ შეხვედრაზე არ ყოფილა საუბარი იმაზე, რომ ეკა ბესელიას დაეტოვებინოს ფრაქცია. დღესაც ვიტყოდი, ამ განცხადების შემდგომაც, რომელიც ყველამ იხილა, ეს საკითხი არ არის აქტუალური, თუმცა ბევრი რამე დამოკიდებულია ეკაზე, იმაზე, თუ რა გადაწყვეტილებას მიიღებს, მე პირადად შემიძლია ვთქვა,რომ ეკა ჩვენი გუნდისთვის არის ძალიან დასაფასებელი და ვისურვებდი იგი დარჩეს „ქართულ ოცნებაში“-ამბობს გიორგი კახიანი.