საქართველოს უმაღლესი საკანონმდებლო ორგანოს ვიცე-სპიკერი თამარ ჩუგოშვილი მოსამართლეების ე.წ. შავი სიის შემადგენლობის გადახედვას ითხოვს. განცხადება ამის შესახებ თამარ ჩუგოშვილმა დღეს გააკეთა. იგი ასევე გამოეხმაურა გავრცელებულ ინფორმაციას იმის შესახებ, რომ მმართველი გუნდიდან შესაძლოა ეკა ბესელია და გედევან ფოფხაძე გაირიცხონ:

„რაც შეეხება ზოგადად გარიცხვის თემას თუ ა.შ. მე არ ვიცი, მე მსგავსი არ მომისმენია. მხოლოდ მედიიდან მივიღე ეს ინფორმაცია. ჩვენ გუნდში ამასთან დაკავშირებით საუბარი არ გვქონია და არც მომწონს ასეთი მიდგომები. მე ვფიქრობ, რომ თუ არსებობს აზრთა სხვადასხვაობა და თუ არსებობს პრობლემები გუნდში, თვითონ პრობლემები არის მოსაგვარებელი. არც გარიცხვა და არც ამაზე საუბარი პრობლემებს არ შველის. პრობლემებს გადაჭრა უნდა და არა გარიცხვა სხვადასხვა წევრების. ვინ რა ფორმით გამოხატავს აზრს, ვინ როგორ პოზიციას დაიჭერს, ვინ გუნდის შიგნით იტყვი თუ გუნდის გარეთ, ეს ჩემთვის არის მეორეხარისხოვანი. იმიტომ, რომ ჩვენი ქვეყნისთვის მნიშვნელოვანი არის სწორი და კარგი სასამართლო სისტემა. კარგი სასამართლო სისტემა არ არსებობს რეპუტაციის გარეშე და სასამართლოს რეპუტაციას დისკრედიტებული ადამიანები ვერ შექმნიან,“-განაცხადა თამარ ჩუგოშვილმა.