არასამთავრობო სექტორი უზენაესი სასამართლოს მოსამართლეობის კანდიდატთა შერჩევის კრიტერიუმების შემუშავების აუცილებლობაზე ამახვილებს ყურადღებას და პარლამენტს არსებული სიის უკან გაწვევას ურჩევს. ამასთან დაკაშრიებით არასამთავრობო ორგანიზაციებმა დღეს შეხვედრა გამართეს:

„აუცილებელია, პარლამენტმა სასწრაფოდ დაიწყოს მუშაობა იმ პროცედურებისა და კრიტერიუმების განსასაზღვრად რომლის საფუძველზეც უნდა მოხდეს იუსტიციის უმაღლესი საბჭოს მიერ საქართველოს უზენაესი სასამართლოს მოსამართლეების დასახელება. ახლა ნომინირებული ადამიანების იქ დანიშვნა შეიძლება აღმოჩნდეს კატასტროფული შედეგების მომტანი“- განაცხადა არასამთავრობო ორგანიზაცია ”საქართველოს დემოკრატიული ინიციატივას” თავმჯდომარე გიორგი მშვენიერაძემ.

"ახალგაზრდა იურისტთა ასოციაციის" თავმჯდომარის სულხან სალაძის თქმით, არასამთავრობო ორგანიზაციები არ აპირებენ მხოლოდ ერთი ბრიფინგით შემოიფარგლონ. ისინი საკანონმდებლო ორგანოსგან კატეგორიულად მოითხოვენ განსაზღვროს მოსამართლეთა შერჩევის კრიტერიუმები.

„თუ ვინმე ფიქრობს ხელისუფლებაში, რომ ეს ჩვენი დღევანდელი პრესკონფერენცია არის ერთჯერადი ღონისძიება და ამით დავასრულებთ ჩვენს აქტიურობას ამ თემასთან დაკავშირებით ძალიან ცდებიან, ბევრ ადგილას და ბევრ შემთხვევაში დახვდებათ წინ ის, რასაც ახლა ისინი აკეთებენ სასამართლოსთან მიმართებაში“- განაცხადა სალაძემ.