„დაფინანსებული ცრუ ინფორმაციების გავრცელებას მასშტაბური ხასიათი ჰქონდა წინასაარჩევნოდ, რაც უდიდესი პრობლემაა“ - გიორგი ვაშაძე პატრიარქის ეპისტოლეს ეხმაურება

პოლიტიკა - 14:51, 07 Jan, 2019

1478

საქართველოს კათოლიკოს-პატრიარქმა, ილია მეორემ საშობაო ეპისტოლეში სიტყვის თავისუფლების დამახინჯებული აღქმის გაბატონების მცდელობაზე ისაუბრა. ეპისტოლეში ნათქვამია, რომ დღეს ადგილი აქვს სიტყვის თავისუფლების ბოროტად გამოყენებას და ცილისწამები შეგნებულად გავრცელებას, რასაც მსმენელი შეცდომაში შეყავს.

პატრიარქის ეპისტოლეს ამ ნაწილს აფასებენ ოპოზიციაში. გაერთიანებული ოპოზიციის „ძალა ერთობაშია“ ერთ-ერთი ლიდერი გიორგი ვაშაძე ამბობს, რომ უმნიშვნელოვანესი გზავნილები იყო პატრიარქის ეპისტოლეში, რომელიც ქვეყანაში არსებულ პრობლემებს ეხება. ვაშაძე ცილისმწამებლური ინფორმაციები გავრცელებასთან დაკავშირებით წინასაარჩევნო პერიოდს იხსენებს, როცა კონკრეტული ე.წ. ფეიკნიუები ფინანსდებოდნენ გარკვეული ჯგუფების მიერ.

„პირველ რიგში, ესაა ცრუ ინფორმაციების გავრცელება, რომელსაც ჰქონდა ძალიან მასშტაბური ხასიათი ამ წინასარჩევნო პერიოდში როგორც სოციალური ქსელების, ასევე ტელევიზიების მეშვობით. ვფიქრობ ეს უდიდესი პრობლემაა, განსაკუთრებით, როცა ეს ე.წ. ფეიკნიუსები ფინანსდება გარკვეული ჯგუფების მიერ და ფართოდ ვრცელდება, რაც შემდეგ არასწორ შთაბჭედილებებს ქმნის საზოგადოებაში. ამაზე არაერთი კვლევა არსებობს და მას სჭირდება სათანადო ყურადღება“ - აცხადებს გიორგი ვაშაძე "ნიუპოსტთან".