უკრაინის ავტოკეფალი და ტომოსი, რომელსაც მსოფლიო პატრიარქმა ხელი 5 იანვარს მოაწერა - აღნიშნულ საკითხთან მიმართებით საქართველოს მართლმადიდებელი ეკლესიის პოზიცია ჯერჯერობით უცნობია.

27 დეკემბერს ჩატარებულ წმინდა სინოდის სხდომაზე, მღვდელმთავრები შეთანხმდნენ, რომ ტომოსის მიღებას დაელოდებოდნენ და მისი გაცნობის შემდეგ მიიღებდნენ გადაწყვეტილებას. აღნიშნულ საკითხზე საქართველოს ეკლესიაში აზრთა სხვადასხვაობაა.

ჭყონდიდის მიტროპოლიტი მეუფე პეტრე აღნიშნულის მიზეზად სხვადასხვა ფაქტორს ასახელებს და ერთ-ერთი მათ შორის რუსეთია:

„მე ვფიქრობ, რომ კრიზისი გააღრმავა რუსეთის ეკლესიის მხრიდან არაადეკვატურმა ომის და სისხლის ენაზე საუბარმა, აგრესიული ენით საუბარმა და გააღრმავა იმან, რომ მათ არ აღმოაჩნდათ დიდსულოვნება, თავად გადაედგათ ეს ნაბიჯი და თავად ყოფილიყვნენ ინიციატორები უკრაინელი ერისათვის ავტოკეფალიის მინიჭებისა. როდესაც მსოფლიო პატრირქმა რამდენიმე დღის წინ, სანამ შედგებოდ ტომოსი, ფაქტიურად ანდერძი დატოვა, რომ ჩემზე იმდენად დიდია ზეწოლა, რომ შეიძლება 6 იანვრამდე ვერ მივაღწიო და ფაქტობრივად ანდერძის საშუალებით სთხოვა სინოდის წევრებს, ამ შემთხვევაში დაუყოვნებლივ მომხდარიყო ტომოსის გადაცემა, ამით უკვე ჩვენ ვხედავთ, თუ რა ძალებია ჩართული ამაში, რა წინააღმდეგობებია ჩართული და ეს ძალები რომ საქართველოსა და სხვა მართლმადიდებლურ სამყაროზე მოქმედებენ, ამაში ეჭვი არ უნდა შეგვეპაროს, მაგრამ უფალი მეფობს და ღმერთი არის სიმართლეში და არა ძალაში“, - აღნიშნა მეუფე პეტრემ.