საქართველოს პარლამენტის თავმჯდომარე ირაკლი კობახიძე საპარლამენტო უმრავლესობის წევრებს რამდენიმე საათის განმავლობაში ხვდებოდა. აღნიშნულს შეხვედრას პარამენტის ვიცე-სპიკერი გია ვოლსკიც ესწრებოდა.

შეხვედრის დასრულების შემდეგ, ვოლსკიმ ჟურნალისტებთანს აუბრისას განაცხადა, რომ ფრაქციამ სწორი გადაწყვეტილება მიიღო იურიდიულ საკითხთა კომიტეტიდან გედევან ფოფხაძის გარიცხვის თაობაზე.

„კრიზისს ამას ვერ დავარქმევთ. არის ერთი მნიშვნელოვანი ფაქტორი, რაც ახასიათებს ქართულ ოცნებას - თემები არ არის, რაც გარეთ არ გამოდის და ვფიქრობ, ეს სწორია. გამჭვირვალობის ეს ხარისხი, ხშირ შემთხვევაში, საკმაოდ სკანდალურად არის წარმოჩენილი. ეს თემა მართლაც მნიშვნელოვანია, რომელიც მოსამართლეებს ეხება და კომიტეტში დანიშვნის, არჩევის საკითხებს ეხება. ამასთან დაკავშირებით ჩემი მოსაზრებაც არის ის, რომ გარკვეული პროცედურული დარღვევებიც იყო და ვფიქრობ, პოლიტიკურადაც არასწორი იქნა გადაწყვეტილება მიღებული, ფრაქციასთან შეუთანხმებლად. აქედან გამომდინარე, ვფიქრობ, რომ ფრაქციამ სწორი გადაწყვეტილება მიიღო,“ - განაცხადა გია ვოლსკიმ.