"სრულიად გაუგონარი პასუხები გამცეს... არ გეჩვენებათ" - რა პასუხი მიიღო ბაჩანა შენგელიამ განათლების უწყებიდან

პოლიტიკა - 15:38, 04 Jan, 2019

2652

ზუგდიდის მე-6 სკოლის გარდაცვლილი დირექტორის, ია კერზაიას შვილი, ბაჩანა შენგელია აცხადებს, რომ განათლების სამინისტროს მიმართა და საჯარო დოკუმენტაცია მოითხოვა, უწყებისკან კი გაუგონარი პასუხები მიიღო.

“რამდენიმე დღის უკან განათლების სამინისტროს მივმართე საჯარო ინფორმაცის გამოთხოვის შესახებ წერილებით, რაზედაც სრულიად გაუგონარი პასუხები გამცეს, მაგ. პერსონალურ ინფორმაციად მიიჩნიეს საჯარო მოხელეების ზუგდიდში სახელმწიფო ბიუჯეტის ხარჯზე მივლინების შესახებ ბრძანება, დანარჩენი პასუხებიდან არც ერთი (!) წერილი არ პასუხობდა დასმულ შეკითხვებს.

მაგრამ ერთი დოკუმენტი საერთოდ აღარ ჯდება არანაირ სტანდარტში და სრულიად წარმოუდგენელია. მე-6 საჯარო სკოლის შემოწმების საფუძვლად მითითებული წერილის #01441086 სრული ვერსიის გამოთხოვის პასუხად გამომიგზავნეს თანდართული დოკუმენტი. მართლა ეგ, არ გეჩვენებათ”- წერს ბაჩანა შენგელია ფეისბუკზე და აღნიშნული დოკუმენტის ფოტოს აქვეყნებს.

შეგახსენებთ: ზუგდიდის მე-6 საჯარო სკოლის დირექტორი ია კერზაია დეკემბრის დასაწყისში გარდაიცვალა. ის ინსულტის დიაგნოზით, საავადმყოფოში მძიმე მდგომარეობაში იმყოფებოდა, თუმცა ექიმებმა მისი გადარჩენა ვერ შეძლეს.

ოჯახი პოლიტიკურ ზეწოლაზე საუბრობს. გარდაცვალებამდე ზეწოლაზე საუბრობდა თავად ია კერზაიაც. ის ამბობდა, რომ სთხოვდნენ საარჩევნო პროცესებში ჩართვას და სალომე ზურაბიშვილის სასარგებლოდ ხმების მობილიზებას. უარის მიღების შემდეგ კი მის სკოლაში ინსპექტირების სამსახური შევიდა.