პარტია „ქართული ოცნების“ თავმჯდომარე ბიძინა ივანიშვილი კანაფის კულტივაციასთან დაკავშირებული კანონპროექტის პარლამენტიდან გაწვევის გამო გუნდზე გაბრაზებულია - ამის შესახებ ინფორმაციას „ინტერორესნიუსი“ ავრცელებს. გავრცელებული ინფორმაციის თანახმად, ბიძინა ივანიშვილმა უკმაყოფილება გუშინ პარტიის ოფისში გამართულ შეხვედრაზე გამოხატა და წამოჭრა საკითხი „კანაფის კონტროლის შესახებ“ საკანონმდებლო პაკეტთან დაკავშირებით. იგი უკმაყოფილო იყო იმ ფაქტით, რომ პარლამენტმა აღნიშნული კანონპროექტის მიღება ვერ შეძლო, შედეგად კი ქვეყანამ „დიდი ფული“ დაკარგა.

„ნიუპოსტი“ საკითხის გადასამოწმებლად საპარლამენტო უმრავლესობის წევრს აკაკი ზოიძეს დაუკავშირდა. მისი თქმით, საუბარი შეეხო იმ ფაქტს, რომ მსგავს საკითხებზე საზოგადოების სწორი ინფორმირება იყო საჭირო. მან უარყო ფაქტი იმის შესახებ, რომ ბიძინა ივანიშვილმა საპარლამენტო უმრავლესობის მისამართით უკმაყოფილება გამოხატა:

„საუბარი იყო არასწორ კომუნიკაციაზე, თორემ უკან გაწვევაზე კი არ იყო საუბარი. საუბარი იყო არსწორი კომუნიკაციის მაგალითზე კანონპროექტებთან მიმართებაში, როგორც იყო მაგალითად კანაფის კულტივაციაზე, როგროც გუნდის შიგნით, ასევე საზოგადოებისთვის, რამაც გამოიწვია ადამაინების მხრიდან ძალიან არასახარბიელო რეაქცია. არავითარ დაბრუნებაზე და მსგავს თემებზე არ ყოფილა საუბარი. არ ყოფილა საყვედური, ჩვეულებრივი ფაქტის კონსტანტაცია იყო, რა საყვედური, საიდან მოიტანეს? რაც ვთქვი, ასეთი წინადადება იყო, ინტერპრეტაცია მოჰყვა ამას, ჩვეულებრივი ფაქტის კონსტანტაცია იყო, რათა მომავალში გავითვალისწინოთ, რომ რეალურად ადამიანებთან უკუკავშირი და კომუნიკაცია გაცილებით სხვანაირი უნდა იყოს და კონკრეტულ თემაზე ნათალდ უნდა ყოფილიყო ახსნილი, რა არის რისკი, რა არის სარგებელი და არა ისე, როგორც ეს ამბავი გავიდა“, - აღნიშნა ზოიძემ.

რაც შეეხება კითხვას, მოსალოდნელია თუ არა აღნიშნული კანონპროექტის მიღების დღის წესრიგში დაბრუნება, ზოიძემ პასუხად უარი განაცხადა და აღნიშნა, რომ „ეს თემა დასრულდა“:

„ეს საკითხი დღის წესრიგში აღარ დადგება, აზრი არ აქვს, მას შემდეგ, რაც ეს ერთჯერადი ფანჯარა იყო შესაძლებლობის, დასრულდა ეს თემა“, - დასძინა დეპუტატმა.