თეონა ჭალიძემ თბილისის მერიას სასამართლო დავა მოუგო - საუბარია 2014 წელს მისი მერიიდან გათავისუფლების საქმეზე. უზენაესი სასამართლოს დადგენილებით ოპოზიციური გაერთიანება „ძალა ერთობაშიას“ წევრი სამსახურიდან უკანონოდ იქნა გათავისუფლებული და თბილისის მერიას მისთვის კომპენსაციის გადახდა დაევალა. თუმცა, სასამართლომ არ გაითვალისწინა დაცვის მხარის ის ნაწილი, რომლის მიხედვითაც ჭალიძის გათავისუფლება სამსახურიდან პოლიტიკური ნიშნით მოხდა:

„ოთხი წლის განმავლობაში ვიბრძოდით იმისთვის, რომ დაგვემტკიცებინა, რომ უკანონოდ ვიყავი გათავისუფლებული და საბოლოოდ, ბოლო ინსტანციის სასამართლომ დაადასტურა, რომ მართლაც უკანონოდ გახლდით გათავისუფლებული და თბილისის მერიას დაეკისრა ჩემს მიმართ განაცდურის ანაზღაურება, თუმცა მოსამართლემ არ გაიზიარა ის, რომ ნამდვილად პოლიტიკური ნიშნით გახლდით გათავისუფლებული. ამის დასტური არის ის ფოტოც , რომელიც ახლდა ჩემი გათავისუფლების ბრძანებას , საქართველოს პრეზიდენტთან, მიხეილ სააკაშვილთან გადაღებული ფოტო“- აცხადებს ჭალიძე.