„ქართული ოცნების“ წევრის, ე.წ „ძველი გუნდის“ წარმომადგენლის ლევან გოგიჩაიშვილის თქმით, უზენაესი სასამართლოს მოსამართლეების საკითხი წყალგამყოფად იქცა იმ ადამიანებს შორის, ვისაც ჯალათი მოსამართლეების ისევ სასამართლოში ხილვა სურდს და ვისაც არ სურს, ამას უკავშირებს გოგიჩაიშვილი დღეს გედევან ფოფხაძის იურიდიული კომიტეტიდან გაწვევასაც.

„ეს გადაწყვეტილება არის წყალგამყოფი იმისა, რომ იმ ადამიანებს, ვისაც უნდათ, რომ მურუსიძე-ჩინჩალაძე-ადეიშვილის-სააკაშვილის ჯალათები იხილონ მოსამართლეებად და იმ ადამიანებს შორის, ვისაც არ უნდათ, რომ ეს ადამიანები იქ იხილონ . ამ პარლამენტში, ღრმად დარწმუნებული ვარ, რომ სააკაშვილი, ადეიშვილის ჯალათი მოსამართლეები უზენაეს სასამართლოს უვადო მოსამართლეები ვერ გახდებიან“- განაცხადა ლევან გოგიჩაიშვილმა.

ე.წ. ახლების თქმით, გედევან ფოფხაძის კომიტეტიდან გარიცხვა არ უკავშირდება მოსამართლეების სიას და ის პროცედურულმა დარღვევებმა გამოიწვია.

„ახლა ვსაუბრობთ, რაღაც თემა უნდა მიეკეროს თუ არა მეორე თემას, არგუმენტები და ემოციები ვნახეთ. არგუმენტებით ეს თემა იმ თემას, რაზეც საუბრობთ, არ ეკერება, თუ ემოციები გნებავთ, პირადად ჩემი, მე ვარ ის ადამიანი, რომელსაც იმის გამო, რომ თავის დროზე სააკაშვილის რეჟიმს შევეწინააღმდეგე, პატიმრობა შემიფარდეს მუხლზე, რომელზეც კანონი არ ითვალისწინებდა პატიმრობას. ამიტომ მე რაღაცებს ვერავინ დამაბრალებს ადვილად. გთხოვთ, საზოგადოება შეცდომაში არ შევიყვანოთ, რაღაც თემა, რომელიც არ იყო დაკავშირებული მეორესთან, ძალით ჩვენ თვითონ არ მივაკეროთ.“- განაცხადა ფრაქცია „ქართული ოცნების“ თავმჯდომარემ, მამუკა მდინარაძემ.

დეპუტატმა რომან კაკულიამ ლევან გოგიჩაიშვილს ბარიერების არგავლებისკენ მოუწოდა.

„გამივლე უკვე შენ მე ზღვარი და მითხარი, რაღაც ზღვარის იქეთ ვარ თუ აქეთ, ამ დროს მე ჩემს ზღვარს ვპოულობ და ვიპოვი მომავალშიც,“- განაცხადა კაკულიამ.