საქართველოს პრემიერმინისტრმა ბიძინა ივანიშვილმა შუახევში ჰესის გახსნის დროს განაცხადა, რომ ამ მასშტაბური მშენებლობის დაწყება მოსახლეობას დიდ სარგებელს მისცემს.

პრემიერი აჭარაში განვითარებულ სხვა პროექტებსაც შეეხო.

„მინდა მადლობა გადავუხადო ადგილობრივ მოსახლეობას, ასეთი გაგებისათვის. ძალიან იოლად, უხმაუროდ, შუახევში ვახერხებთ ასეთი მასშტაბური მშენებლობის დაწყებას. რა თქმა უნდა, უნდა მოხერხდეს რომ ადგილობრივი მოსახლეობა ჯერ ზოგადად, საქართველოს აღორძინებასა და ეკონომიკაში ითამაშებს დიდ როლს და უფრო კონკრეტულად, უფრო დიდი სარგებელი უნდა მიიღონ ამ ჰესის მშენებლობიდან. 

მადლობა ორგანიზატორებს, რომ აქ სკოლა დაარსდა. როგორც გამომსვლელმა მოგახსენათ, უკვე 600-ზე მეტი სტუდენტის გადამზადება დაწყებულია. ეს, რა თქმა უნდა, რეგიონში დამატებითი შეღავათი იქნება. 

მე ვიცი და თქვენც კარგად მოგეხსენებათ, რომ ბევრი პოლიტიკოსი ამით სპეკულირებდა და ხშირად ძალიან მოკლე ვადით ახერხებდა მოსახლეობის დარწმუნებას, მაგრამ სტრატეგიულად ჩვენ ძალიან გვჭირდება ელექტროჰესების მშენებლობა. 

ჩვენ არა გვაქვს ისეთი საექსპორტო საშუალებები, რომ ელექტროენერგია გარედან ვიყიდოთ. ენერგოდამოუკიდებლობა, ქვეყნის დამოუკიდებლობის ერთ-ერთი საფუძველი იქნება“, - თქვა პრემიერმინისტრმა.