საოკუპაციო რეჟიმმა აფხაზური მონეტების ამერიკულ ჟურნალში დაბეჭდვისთვის ფული გადაიხადა

პოლიტიკა - 19:08, 30 Dec, 2018

785

ამერიკულმა ჟურნალმა WORLD COINS (მსოფლიოს მონეტები) წლის კატალოგში აფხაზეთში მოჭრილი მონეტების შესახებ ინფორმაცია გამოაქვეყნა, სადაც რუსეთის მიერ ოკუპირებული აფხაზეთი დამოუკიდებელ ქვეყნად არის მოხსენიებული. ინფორმაციას livepress.ge ავრცელებს.

Livepress-მა აღნიშნული ჟურნალისგან განმარტების სახით მიიღო ინფორმაცია, რომ ახალი კატალოგის რვა გვერდში, რომელიც სარეკლამო სივრცეებია, დე ფაქტო რესპუბლიკამ თანხა გადაიხადა.

„კორპორაცია F+W Media ყიდის სარეკლამო სივრცეს მსოფლიო მონეტების სტანდარტული კატალოგის პრიალა გარეკანის შიდა მხარეს. მსოფლიო მონეტების სტანდარტული კატალოგის 2001-2019 წლის მე-13 გამოცემაში, აფხაზეთის ბანკმა შეისყიდა სივრცე 8 გვერდიანი რეკლამისთვის, 2008-2016 წლებში მათ მიერ გამოცემული მონეტების წარმოსაჩენად. ამ რეკლამით ილუსტრირებულ იქნა აფხაზეთის მიერ გამოცემული მონეტების ძალიან მცირე ნაწილი“, - აცხადებს ჟურნალის რედაქცია.

მათივე განმარტებით, მხოლოდ „აფხაზეთის ბანკის“ მიერ ნაყიდ გვერდებზე გვხვდება ისტორია და აფხაზეთის ამჟამინდელი სტატუსი, მსოფლიო მონეტების სტანდარტული კატალოგის 2001 - მე-13 გამოცემაში კი არსად მოიპოვება ჩანაწერი, სადაც აფხაზეთი მოხსენიებულია, როგორც დამოუკიდებელი ერი.

ჟურნალის რედაქციაში აღნიშნავენ, რომ მსოფლიო მონეტების სტანდარტული კატალოგი არ უზრუნველყოფს აფხაზეთის მონეტების სტანდარტულ ჩამონათვალს, სადავო რეგიონის სუვერენიტეტის საერთაშორისო დონეზე აუღიარებლობის გამო.

სამაგიეროდ, აფხაზეთის შესახებ ინფორმაციას ვერ ნახავთ pdf ფაილში, რომელიც „ლაივპრესს“ საქართველოს საგარეო საქმეთა სამინისტრომ მიაწოდა. მათ თავდაპირველად გვითხრეს - ფოტოები და ვიდეო, რომელიც დე ფაქტო რესპუბლიკის წარმომადგენელმა გამოაქვეყნა, სინამდვილეს არ შეესაბამებოდა, თუმცა ამერიკული ჟურნალისგან მიღებული პასუხის შემდეგ, მათ ინფორმაციის უტყუარობა დაადასტურეს.

„კომპანიასთან თავიდანვე ჰქონდა კომუნიკაცია საქართველოს საელჩოს აშშ-ში, და ეს კომუნიკაცია დღესაც გრძელდება. მათ ჩვენთანაც დაადასტურეს, რომ სარეკლამო ადგილი შეიძინა აფხაზეთის ბანკმა, მაგრამ ახლა ის არის დასადგენი, როგორ იურიდიულ სუბიექტთან გაფორმდა შეთანხმება. მუშაობა ამ საკითხზე გრძელდება“, - გვითხრეს სამინისტროში და აღნიშნეს, რომ მათ მიერ მოპოვებულ კატალოგის pdf ფაილს არ ჰქონდა ის სარეკლამო გვერდები, რაც ბეჭდურ ვერსიაში გამოქვეყნდა.