ორი თვეა, 50-ე ბაგა-ბაღში ბავშვები ვეღარ დადიან, რადგან სამხარაულის სახელობის ექსპერტიზის ბიურომ შენობა ავარიულად შეაფასა და ადმინისტრაციამ ის დაკეტა.

ბავშვები არც სხვა ბაღებში გადაუნაწილებიათ, ამიტომ მათ მთელი დღის განმავლობაში სახლში უწევთ ყოფნა. ეს კი პრობლემას უქმნის დასაქმებულ მშობლებს. ისინი ამბობენ, რომ შვილებს ვერსად ტოვებენ, ამიტომ სამსახურების დაკარგვის საფრთხის წინაშე დგანან. მშობლების თქმით, თავდაპირველად უთხრეს, რომ შენობა ათი დღით იკეტებოდა, შემდეგ განუმარტეს, რომ ბავშვები ბაღში ზამთრის არდადეგების შემდეგ დაბრუნდებოდნენ. თუმცა, მათი თქმით, ამ დრომდე არავინ სცემს კონკრეტულ პასუხს, შეძლებენ თუ არა ბავშვების მიყვანას ბაღში 14 იანვრიდან.

როდის შეძლებენ ბაღში ბავშვების მიყვანას ან როდის მოხერხდება დროებით ალტერნატიული ფართის ქირაობა, ამაზე კამერასთან საუბარი არ ისურვა დირექტორის მოვალეობის შემსრულებელმა.