"ირაკლი კობახიძის შეხვედრა გიორგი მიქაუტაძესთან აღიქმება, როგორც თავმჯდომარის მიერ კლანის მხარდაჭერა" - ანა დოლიძემ და ნაზი ჯანეზაშვილმა საგანგებო ბრიფინგი გამართეს

პოლიტიკა - 12:06, 29 Dec, 2018

1165

იუსტიციის საბჭოს არამოსამართლე წევრებმა დღეს საგანგებო ბრიფინგი გამართეს. ანა დოლიძემ და ნაზი ჯანეზაშვილმა ბოლო პერიოდში სასამართლო სისტემაში შექმნილ სიტუაციაზე ისაუბრეს.

ანა დოლიძის თქმით, იუსტიციის საბჭოს არამოსამართლე წევრების ბრძოლის შედეგია ის, რომ პარლამენტმა უზენაესი სასამართლოს მოსამართლეების სიის დამტკიცება შეაჩერა. რამაც კიდევ ერთხელ აჩვენა ის კრიზისული მდგომარეობა რაც სასამართლო სისტემაშია. დოლიძემ მადლობა გადაუხადა ყველა იმ ადამიანს, რომლებიც არამოსამართლე წევრების მოსაზრებას ეთანხმებოდნენ და მოსამართლეების სიის დამტკიცება შეაჩერეს. ანა დოლიძის თქმით, იუსტიციის საბჭოს მიერ ლევან მურუსიძის უვადო მოსამართლედ დანიშვნა იმ კლანის ბოლო გაფართხალებაა, რომელიც სასამართლო სისტემაში არსებობს.

„ლევან მურუსიძის უვადო მოსამართლედ დანიშვნა არის კლანის გაფართხალება.“- განაცხადა ანა დოლიძემ. მისი თქმით, გუშინ ირაკლი კობახიძის შეხვედრა იუსტიციის საბჭოს მდივანთან ამ კლანის მხარდაჭერად აღიქმება და მიუღებელია.

ნაზი ჯანეზაშვილი პარლამენტისგან მოითხოვს, რომ საკანონმდებლო ორგანომ შეიტანოს ცვლილებები უზენაესი სასამართლოს მოსამართლეების დანიშვნის წესში და მათი დანიშვნა მოხდეს არა იუსტიციის საბჭოს წევრების რაოდენობის უმრავლესობით, არამედ კონსესუსის საფუძველზე.