„ნაციონალური მოძრაობა“ თემირლან მაჩალიკაშვილის მკვლელობის საქმეზე საგამოძიებო კომისიის შექმნას ითხოვს. ოპოზიციის განმარტებით, დაზარალებულებს აქვთ საფუძვლიანი კითხვები და უნდობლობა გამოძიების მიმართ, რომელსაც დღემდე არ მოუხდენია სათანადო სამართლებრივი რეაგირება.

„ნაციონალური მოძრაობაში“ მიაჩნიათ, რომ მნიშვნელოვანია დადგინდეს, ვის მიერ და რის საფუძველზე იყო ბრძანება გაცემული.

თემირლან მაჩალიკაშვილის მკვლელობის საქმე - „ერთიანი ნაციონალური მოძრაობა“ საგამოძიებო კომისიის შექმნას ითხოვს. ოპოზიციის რიგებში აცხადებენ, რომ დაზარალებულებს საფუძვლიანი კითხვები და ეჭვები აქვთ გამოძიების მიმდინარეოაბსთან დაკავშირებით. ენმ-ის რიგებში მიაჩნიათ, რომ აუცილებელია დადგინდეს რას ემსხვერპლა 19 წლის ბიჭის სიცოცხლე:

„შეუძლებელია, რომ გამოძიება წარიმართოს სამართლიანად, ვხედავთ, რომ არავითარი შედეგი არ არის, ხელისუფლება მონდომებულია, რომ ეს საქმე არ იქნას ობიექტურად გამოძიებული. ამიტომ, ერთადერთი გამოსავალი დღეს არის დროებითი საპარლამენტო კომისიის შექმნა, რომლის ფარგლებშიც უნდა იყოს შესწავლილი ეს საკითხი,“ - განაცხადა „ნაციონალური მოძრაობის“ წევრმა, რომან გოცირიძემ.

კომისიის შექმნის საჭიროებას ვერ ხედავენ მმართველ გუნდში.

„ვფიქრობ, რომ თუ კითხვები არსებობს, სხვა ფორმით უნდა მოხდეს ამ კითხვების ამოწურვა. მათ ჰქონდათ შესაძლებლობა კითხვები დაესვათ უშიშროების სამსახურის ხელმძღვანელისთვის დახურულ ფორმატში, როდესაც ის ანგარიშს წარადგენდა წლის განმავლობაში. მე ვფიქრობ, რომ ამის შესაძლებლობა კიდევ ექნებათ და ეს ფორმატი უფრო მისაღებია,“ - განაცხადა დიმიტრი ცქიტიშვილმა.