„ქართული ოცნების“ რჩეულმა კანდიდატმა არჩევნებზე თითო მიღებულ ხმაზე 90 ლარი დახარჯა - „ფორბსის: გათვლებით, აღნიშნული მონაცემი 90-ჯერ უფრო ნაკლები იყო გრიგოლ ვაშაძის ბიუჯეტზე, რომელსაც ერთი საარჩევნო ხმისთვის 1 ლარი ჰქონდა.

სახელმწიფო აუდიტის სამსახურის მიერ გამოქვეყნებული მონაცემებიდან დგინდება, რომ ბიზნესი ფულს პრეზიდენტს არჩევნების შემდეგაც ჩუქნის. „ქართული ოცნების“ მხარდაჭერილმა კანდიდატმა 2 მილიონზე მეტი შემოწირულობა მას შემდეგ მიიღო რაც ცენტრალურმა საარჩევნო კომისიამ ის გამარჯვებულ კანდიდატად გამოაცხადა.

On.ge-ს ინფორმაციით - ზურაბიშვილს მეორე ტურის დასრულების შემდეგ დეკემბერში 60 ათასი ლარი 15-მა ადამიანმა შესწირა, 50 ათასი - სამმა, 40 ათასი - ორმა, 30 ათასი კი - 10-მა. აქედან ერთ-ერთი ყველაზე მსხვილი გადამხდელი, რომელმაც 180 ათასი ლარი სალომე ზურაბიშვილის ანგარიშზე ჩარიცხა, კომპანია „ილი ჯგუფია“.

თანხა ფირმამ 14 დეკემბერს პრეზიდენტის ფონდისთვის მას შემდეგ გაიღო, რაც 13 დეკემბერს 2.8-მილიონიან ტენდერში გაიმარჯვა და უფასო სასადილოების კვების პროდუქტებით უზრუნველყოფის სახელმწიფო შეკვეთა მიიღო. საერთო ჯამში 11-13 დეკემბერს „ილი ჯგუფმა“ 7 მილიონის ღირებულების სამი ტენდერი მოიგო, 180 ათასი სალომე ზურაბიშვილს აჩუქა.

კიდევ უფრო მასშტაბური - 20 მილიონიანი ტენდერი მოიგო კომპანია „ცეკურმა“ 3 დეკემბერს. 120 ათასი ლარი კომპანიის ხელმძღვანელმა სერგო და ბექა ხაბულიანებმა სალომე ზურაბიშვილის ფონდში 14 დეკემბერს, სახელმწიფო დაკვეთის მიღების შემდეგ გადარიცხეს.

ოპოზიციაში აცხადებენ, რომ სერგო ხაბულიანი „ქართული ოცნების“ ყოფილი დეპუტატი და მმართველი პარტიის დამფინანსებელია:

„ეს კომპანია პირდაპირ დაკავშირებულია ქართული ოცნების ყოფილ დეპუტატთან, სერგო ხაბულიანთან, მაშინაც როცა ის დეპუტატი იყო, ეს კომპანია ათობით მილიონი ლარის ხელშეკრულებას ღებულობდა, მათ შორის თბილისის მერიისგან“, - აღნიშნავს ლევან ხაბეიშვილი.