უზენაესი სასამართლოს მოსამართლეების გამწესება - საქართველოს პარლამენტის თავმჯდომარის ირაკლი კობახიძის განცხადებით, უმაღლესი საკანონმდებლო ორგანო უახლოეს სესიაზე არ მიიღებს აღნიშნულ საკითხზე გადაწყვეტილებას.

იუსტიციის უმაღლესი საბჭოს წევრი, ანა დოლიძე აღნიშნულ საკითხს გამოეხმაურა. ანა დოლიძის შეფასებით, წარდგენილი კანდიდატები არ იმსახურებენ უზენაეს სასამართლოში მანდატებს.

„ჩვენ დღეს მივაღწიეთ იმას, რომ 2019 წელი ჩინჩალაძის წელი არ იქნება. ამ შედეგს განვიხილავ, როგორც პროცესის შეჩერებას, სიაში შემავალი კანდიდატები არ იმსახურებენ ამ მანდატს, პირველ რიგში, საუბარია, რა თქმა უნდა, მიხეილ ჩინჩალაძეზე. გაზაფხულზე გადატანა დიდ საზოგადოებრივ დისკუსიას და მსჯელობას მოიტანს, ქართველი ხალხი იტყვის თავის სიტუაციას და ეს არ მოხდება საახალწლო სუფრასთან, როგორც ახლა აპირებდნენ. ეს მოგვცემს საშუალებას, რომ თუ ეს ქვეყანა იქნება დემოკრატია, ჩვენ შესაბამისი მანდატების, შესაბამისი კალიბრის იურისტები გვეყოლებიან უზენაეს სასამართლოში,“- განაცხადა ანა დოლიძემ.