„იზვესტია“ იუწყება, რომ 16 სექტემბერს თბილისში რუსეთის მთავარი სანიტარული სამსახურის ექსპერტები ჩავლენ, რომლებიც ამჯერად იმ კომპანიებს ესტუმრებიან, რომლებსაც რუსულ ბაზარზე ქართული ლუდის გატანა სურთ.

2006 წელს შემოღებული ემბარგო რუსეთმა სანიტარული სამსახურის ექსპერტების ორი ვიზიტის შემდეგ მოხსნა, რის შემდეგაც საქართველომ უკვე გაიტანა რუსეთში 15 მლნ. ბოთლი მინერალური წყალი და 8 მლნ. ბოთლი ღვინო. „იზვესტიას“ ცნობით, ახლა უკვე რუსეთში ნაკლებადცნობილი ქართული ლუდის ჯერია.

„რუსი ექსპერტები ამ ვიზიტის ფარგლებში ოცამდე კომპანიას ეწვევიან, რომლებიც მინერალურ წყალსა და ალკოჰოლურ სასმელებს აწარმოებენ, რაც შეეხება ქართულ ლუდს, მისი ხარისხის შემოწმება პირველად მოხდება“, - უთხრა „იზვესტიას“ ქართული ღვინის ეროვნული სააგენტოს ხელმძღვანელმა ლევან დავითაშვილმა.

რუსულ ბაზარზე გასვლას, „იზვესტიის“ მიხედვით, პირველ რიგში, „ნატახტარი“ გეგმავს, რომელსაც გამოცემა ქართული ბაზრის ლიდერად მოიხსენიებს, თუმცა, არ გამორიცხავს, რომ მას მიბაძოს „ზედაზენმაც“.