სკოლებში გოგებაშვილის „დედა ენის" დაბრუნებას კომიტეტებმა მხარი დაუჭირეს

სკოლებში გოგებაშვილის „დედა ენის" დაბრუნებას კომიტეტებმა მხარი დაუჭირეს - რატომ აკრიტიკებენ ექსპერტები ინიციატივას

პოლიტიკა - 17:47, 26 Dec, 2018

1586

საქართველოს პარლამენტის საფინანსო-საბიუჯეტო და განათლების, მეცნიერებისა და კულტურის კომიტეტებმა გუშინ მხარი დაუჭირეს ქართული ოცნების დეპუტატების ზაზა გაბუნიასა და მარიამ ჯაშის მიერ წარდგენილ საკანონმდებლო ინიციატივას, რომლის მიხედვითაც, განათლების სამინისტრო, ექსპერტთა საბჭოს მეშვეობით, დედაენას იაკობ გოგებაშვილის მეთოდით მოამზადებს და სასწავლო პროცესისთვის დაბეჭდავს.

კანონპროექტის თანახმად, „ზოგადი განათლების შესახებ“ საქართველოს კანონს ემატება ქვეპუნქტი, რომლის მიხედვით, განათლების სამინისტრო ქმნის ექსპერტთა კომისიას, რომელიც უზრუნველყოფს ეროვნული ან საერთაშორისო კატეგორიის არამატერიალური კულტურული მემკვიდრეობის ძეგლის სტატუსის მქონე მეთოდის საფუძველზე შექმნილი სახელმძღვანელოს მომზადებასა და გრიფირებაზე წარდგენას. ამ სახელმძღვანელოს გრიფირება კი ხდება სპეციალური წესით.

როგორც განმარტებით ბარათშია ნათქვამი, კანონპროექტის მიზანია არამატერიალური კულტურული მემკვიდრეობის ძეგლის - ,,დედაენა“- ქართული საანბანე სახელმძღვანელოს შედგენის იაკობ გოგებაშვილისეული მეთოდი - საკანონმდებლო დონეზე დაცვა და სასწავლო პროცესში მისი გამოყენებისათვის სამართლებრივი საფუძველის შექმნა.

ექსპერტთა კომისიაში წევრები წინასწარი გათვლებით არ უნდა აღემატებოდეს 10 წევრს, ხოლო გასაწევი ხარჯი 12 000 ლარს. ხარჯების დაფინანსება მოხდება სახელმწიფო ბიუჯეტიდან. ეს ხარჯი ერთჯერადია, გარდა იმ შემთხვევისა, თუკი სამინისტრო მიიღებს გადაწყვეტილებას გადაამუშაოს წიგნი. კანონის მიღებიდან ორ თვეში სამინისტრომ უნდა დააკომპლექტოს ექსპერტთა კომისია და 2019-2020 სასწავლო წლის დაწყებამდე უნდა მიიღოს გადაწყვეტილება სახელმძღვანელოს გრიფირებაზე.

აღნიშნული საკანონმდებლო ინიციატივა განათლების ექსპერტთა მხრიდან კრიტიკის საგანი გახდა, მათი თქმით, მიდგომა ზედაპირულია და ვადები იმდენადაა შემჭიდროვებული და მე-19 საუკუნის სახელმძღვანელოს იმ დონეზე გადამუშავება ვერ მოხდება, რომ ის ციფრულ სამყაროში გაჩენილი ადამიანებისთვის აქტუალური იყოს.