"ჩემი ვალი ჩვენი ხელისუფლების პირობებში 2.5-ჯერ გაიზარდა"- ეკონომიკის მინისტრს მწვავე შეკითხვები უმრავლესობამაც დაუსვა

პოლიტიკა - 18:08, 25 Dec, 2018

1116

პარლამენტში დარგობრივი ეკონომიკისა და ეკონომიკური პოლიტიკის კომიტეტის სხდომაზე დღეს ეკონომიკის მინისტრს უსმენდნენ, გიორგი ქობულიას შეკითხვა პარლამენტის გარემოს დაცვისა და ბუნებრივი რესურსების კომიტეტის თავმჯდომარის მოადგილემ ვალებთან დაკავშირებით დაუსვა. ენძელა მაჭავარიანი დაინტერესდა, რა გეგმა აქვს ეკონომიკის სამინისტროს იმასთან დაკავშირებით, რომ მოსახლეობის ვალი, რომელთაც სესხი უცხოურ ვალუტაში აქვთ, ეროვნული ვალუტის გაუფასურების გამო, 2.5 ჯერ გაიზარდა.

„მაგალითად, მე მაქვს ვალი დოლარში და ასეთი ძალიან ბევრია. ჩემი ვალი ჩვენი ხელისუფლების პირობებში 2.5-ჯერ გაიზარდა და ეს განაპირობებს იმას, რომ მე უფრო ღარიბულად ვიცხოვრებ, ვიდრე მანამდე ვცხოვრობდი და ასეთი საკითხები როგორ იქნება მოგავრებული?" - განაცხადა ენძელა მაჭავარიანმა.

საქართველოს ეკონომიკისა და მდგრადი განვითარების მინისტრმა კი განაცხადა, რომ დღეს მოსახლეობას უჭირს, თუმცა, იმაზე მეტად არა, ვიდრე უჭირდა წინა პერიოდებში.

„ერთადერთი, რაც მე ვთქვი, რომ რადგანაც ხალხს ასე უჭირს, იმისგან, რომ დღეს არ უჭირს ბევრად უფრო მეტად, ვიდრე უჭირდა გუშინ, ამ ხალხის სიტუაცია არ იოლდება. ვისაც აქვს ამაზე კითხვა და პრეტენზია, შემიძლია, დავუჯდე და სახალხოდ, დეტალურად გავურჩიო, მაგრამ ვისაც ექნება ამაზე პრეტენზია, არ ვურჩევ ამ საკითხზე ჩემთან დაჯდომას,“ - განაცხადა გიორგი ქობულიამ.