გაერთიანებული ოპოზიციის ლიდერები რუსთავში, ქვემო ქართლის რეგიონალური საარცევნო შტაბების უფროსებს შეხვდნენ. ნიკა მელიას განცხადებით, დავით კირკიტაძე "ქართული ოცნების" პოლიტიკური პატიმარია და მისი დაკავება ხელისუფლების შიშის ნიშანია.

„დათო კირკიტაძე არის კლასიკური პოლიტიკური პატიმარი. ადამიანი, რომელსაც არ აპატიეს ქალაქ რუსთავის ორჯერ მოგება მის თანამებრძოლებთან და რუსთაველებთან ბიძინა ივანიშვილისთვის და რაც არ უნდა ისაუბროს ახლა გახარიამ, რომ თითქოს ჩაიდინა დანაშაული დათო კირიკიტაძემ, არავის ეს არ სჯერა, იმიტომ, რომ დამნაშავე იყო ის ადამიანი, ვინც უკანონოდ კონსტიტუციის ფეხქვეშ გათელით გზა ჩაგვიხერგა. ისეთივე დამნაშავე იყო ის ფორმიანი, როგორი დამნაშავეც იყო, მაგალითად, ის პოლიციელი, რომელმაც მუხთარლის თავზე ტომარა ჩამოაცვა“ - აცხადებს მელია.

„ერთიანი ნაციონალური მოძრაობის“ წევრის, გიორგი ბოტკოველის შეფასებით, ხელისუფლებამ კირკიტაძის დაჭერით ოპოზიციასა და მის მომხრეებთან ურთიერთობა გაამწვავა.

„როგორც ჩანს ივანიშვილის და მთელი ხელისუფლების მთავარი იარა იყო რუსთავში წაგებული არჩევნები და ამით ალბათ, დათო კირკიტაძის დაჭერით ფიქრობენ, რომ ეს იარა მოიშუშეს, მაგრამ მე მინდა ვუთხრა მათ, რომ ეს იარა პირიქით გაიმწვავეს მათ და გაამწვავეს იმ ადამიანებთან ურთიერთობა, რომლებმაც პასუხი გასცეს მათ უმსგავსო საქციელს“- ამბობს ბოტკოველი.