არჩევნების გაყალბების სკანდალური კადრები - ენმ გაყალბებაში იდენტიფიცირებულების დაკავებას მოითხოვს

პოლიტიკა - 12:37, 24 Dec, 2018

1123

"ნაციონალური მოძრაობის" ერთ-ერთმა ლიდერმა ლევან ბეჟაშვილმა მთავარ პროკურატურაში ოპოზიციის სახელით განცხადება შეიტანა.

ოპოზიცია თადუმაძის უწყებას იმ დანაშაულების გამოძიების მოთხოვნით მიმართავს, რომელსაც საარჩევნო პროცესის დროს ჰქონდა ადგილი. უფრო კონკრეტულად, საუბარია კენჭისყრის შედეგების ტოტალურ გაყალბებაზე და საარჩევნო ყუთებში კანონდარღვევით ჩაყრილ ათასობით ბიულეტენზე.

ოპოზიციის ინფორმაციით, კანონდარღვევის ეს ფაქტები ვიდეოკამერებსაც აქვს დაფიქსირებული და იდენტიფიცირებულები არიან კონკრეტული დამნაშავეებიც.

"რუსთავი2"-ის ეთერით გავრცელდა კადრები, სადაც კომისიის წევრები ჩართულნი იყვნენ ამ გაყალბების მექანიზმში. გვაქვს რამდენიმე ასეული ასეთი ჩანაწერი, რომელიც ადასტურებს ამ გაყალბების ფაქტებს.

მიუხედავად ამისა, საზოგადოებას არ აქვს ინფორმაცია, რა საგამოძიებო მოქმედებები ჩატარდა.

პროკურატურას მივმართავთ, გატარდეს საგამოძიებო მოქმედებები, დაიკითხონ ის ადამიანები, რომლებიც ჩართულნი იყვნენ ამ გაყალბებაში, რაც მთავარია, მოხდეს მათი დაკავება იმიტომ, რომ შესაძლოა, ისინი უკვე მტკიცებულებებს აყალბებენ, რათა ხელი შეუშალონ გამოძიებას. თუ ამ დანაშაულზე რეაგირება არ მოხდება, შეგვიძლია ჩავთვალოთ, რომ საქართველოში არჩევნების სისტემა არ არსებობს “-ამბობს ლევან ბეჟაშვილი.