ცენტრალური საარჩევნო კომისიის თავმჯდომარეობის კანდიდატი თამარ ჟვანია ოპოზიციის კრიტიკას პსუხობს. ჟვანია იმ განცხადებას ეხმაურება, რომლის მიხედვითაც ოპოზიცია აცხადებს, რომ „ოცნება თამარ ჟვანიას ხარკს გადაუხდის“. თამარ ჟვანია აცხადებს, რომ ცესკო მისი ხელმძღვანელობის დროს ხარვეზებისა და დარღვევების გარეშე მუშაობდა:

„ხარკის გადახდა არ არსებობს ასეთ პოზიციებზე. ასეთ პოზიციებზე არსებობს ნეიტრალიტეტი, დამოუკიდებლობა და თქვენ ყველა ძალიან კარგად ნახავთ საქმეში, რომელიც ადმინისტრაციამ 5 წლის განმავლობაში ნახა და შემდგომი წლების განმავლობაშიც დაამტკიცებს იმ შემთხვევაში თუ მე ვიქნები ამ ადმინისტრაციის ხელმძღვანელი, რომ ყველაფერი იქნება ხალხის ნების მიხედვით,“ - განაცხადა თამარ ჟვანიამ.

თამარ ჟვანია სამაუწყებლო კომპანია "რუსთავი2"-ის ეთერში გასულ იმ ვიდეომასალაზეც საუბრობს, რომელიც არჩევნების გაყალბებას ასახავს:

„როდესაც ვნახე კადრები, ერთადერთი ადამიანი ვიყავი, რომელმაც სამართლებრივ გზას მივმართე, მე პირადად, საარჩევნო ადმინისტრაციის სახელით, მეორე დღესვე გავუგზავნე კადრები პროკურატურას, გამოძიების დაწყების მიზნით და შესაბამისი შესწავლის მიზნით,“ - ამბობს ჟვანია.