სკანდალი - პარლამენტის ხელმძღვანელობა და მთავრობა საფინანსო და დარგობრივი ეკონომიკის კომიტეტებს საბაჟო კოდექსში შესატანი ცვლილებების რეგლამენტის დარღვევით განხილვას აიძულებენ

პოლიტიკა - 21:20, 21 Dec, 2018

1273

სკანდალი პარლამენტში - „ნიუპოსტის“ ექსკლუზიური ინფორმაციით, პარლამენტის სპიკერატი, კერძოდ, პარლამენტის თავმჯდომარე ირაკლი კობახიძე საფინანსო-საბიუჯეტო და დარგობრივი ეკონომიკის კომიტეტებს აიძულებს, რომ საბაჟო კოდექსში შესატანი ცვლილებები დაჩქარებული წესით და რეგლამენტის დარღვევით ხვალ განიხოლოს. როგორც ჩვენსთვის გახდა ცნობილი, კანონპროექტი ბიუროზე ორი დღის წინ დარეგისტრირდა. ცვლილებების ავტორი საქართველოს მთავრობაა. რეგლამენტით, საკომიტეტო განხილვების დანიშვნას შესაბამისი დრო და პროცედურები აქვს, მაგალითად, კანონპროექტი დეპუტატებს ელექტრონულ ფოსტაზე უნდა გაეგზავნოს გასაცნობად, თუმცა ამ შემთხვევაში ეს არ მომხდარა.

ისნის მაჟორიტარი დეპუტატი დავით ჭიჭინაძე, რომელიც საფინასო-საბიუჯეტო და დარგობრივი ეკონომიკის კომიტეტების წევრია, „ნიუპოსტს“ უდასტურებს, რომ კანონპროექტი დეპუტატებს გასაცნობად არ დაგზავნიათ. ამასთან, ჭიჭინაძე არ გამორიცხავს, რომ საბაჟო კანონში ცვილებების დაჩქარებული წესებით შეტანას ვინმე ლობირებდეს.

„ამ კანონის დაჩქარებული წესით განხილვა და მიღება, როგორც ჩანს, ვინმეს ინტერესშია, თორემ აქამდე არასოდეს ყოფილა, რომ საკომიტეტო განხილვები ასეთი დაჩქარებული წესით, თან რეგლამენტის დარღვევით ჩატარებულიყო. ახალი წელი მოდის, ალბათ, ჰგონიათ, რომ ამ კანონს ყურადღებას არავინ მიაქცევს და იმას მიიღებენ, რაც უნდათ, მაგრამ ამას არ დავუშვებთ. ამას სერიოზული სკანდალი და ხმაური მოჰყვება. რეალურად, მასალები დაგზავნილი არ არის და დეპუტატები არ გაცნობიან. რეგლამენტით, კანონპროექტი ჯერ უნდა განიხილოს დარგობრივი ეკონომიკის კომიტეტმა, ამის შემდეგ კი - წამყვამა საფინანსო საბიუჯეტო კომიტეტმა. დღის წესრიგში გუშინ, ღამე ჩასვეს, რომ დარგობრივ კომიტეტს აღნიშნული კანონპროეტი 24 დეკმებერს განეხილა, ახლა კი, გიდასტურებთ, ითხოვენ, რომ ხვალ სასწრაფოდ ჩატარდეს დარგობრივიც და საფინანსო კომიტეტების სხდომა. ეს გაუცნბიერებელი გადაწყვეტილება, დეპუტატებს ნახირად და ნოტარიუსებად თვლიან, ზუსტად ამის შედეგია ის, სადამდეც მივედით“, - განუცხადა „ნიუპოსტს“ დავით ჭიჭინაძე.