შინაგან საქმეთა მინისტრმა გიორგი გახარიამ დღეს პარლამენტის წინაშე ანგარიში წარადგინა. გახარიამ ხორავას ქუჩაზე მომხდარი მოზარდების მკვლელობის საქმეზე დეპუტატების კითხვებს უპასუხა და საპარლამენტო უმცირესობას შინაარსობრივი საუბარი შესთავაზა:

„როდესაც ატრიალებთ ამ ფრაზებს, ამას ვეძახი მე თქვენს ფსევდოინტელექტუალურ ცეკვებს კამერების წინ. შეგიძლიათ, გააგრძელოთ, მე გთავაზობთ შინაარსობრივ საუბარს, სად წახვალთ ამ ფსევდოინტელექტუალური უმიზნო და აბსულუტურად უაზრო დებატებით. გთავაზობთ ერთ რამეს, შინაარსობრივ კონტექტსში არანაირი პრობლემა არ გვაქვს. თქვენი შეკითხვების არც მე და არც ჩემს გუნდს არ გვეშინია, არასოდეს გვეშინოდა, რადგან ლოგიკურად საკმაოდ სუსტად მსჯელობთ. ის, რაც თქვენ გააკეთეთ ხორავას ქუჩაზე მკვლელობის საქმის საგამოძიებო კომისიის ფარგლებში, ამ პარლამენტისა და საქმისთვის უდიდესი წარუმატებლობა იყო“, – განაცხადა გახარიამ.

გიორგი გახარიას აღნიშნულ განცხადებას „ევროპული საქართველოს“ ერთ-ერთმა ლიდერმა ელენე ხოშტარიამ უპასუხა:

„შინაგან საქმეთა მინისტრი ხართ და მაიმუნობთ. საერთოდ შინაარსი ვერ გამოვიტანე, რას ლაპარაკობთ. ან მკვლელი სად არის, ან რას აპირებთ“, – განაცხადა ხოშტარიამ.