საქართველოს პრეზიდენტმა სალომე ზურაბიშვილმა ცენტრალური საარჩევნო კომისიის თავმჯდომარის თანამდებობაზე სამი კანდიდატი, თამარ ჟვანია, მარიამ შელეგია და ვლადიმერ ბოჟაძე წარადგინა. ზურაბიშვილმა აღნიშნული კანდიდატები მესამე სექტორთან კონსულტაციების შემდეგ დაასახელა. დღეისათვის კი ცნობილი ხდება, რომ აღნიშნულ კონსულტაციებში არცერთი ავტორიტეტული არასამთავრობო ორგანიზაცია ჩართული არ ყოფილა:

"ისეთ სიჩქარეში და ისეთ ფორმატში მოხდა ამ შეხვედრის ორგანიზება, რომ ვნახეთ, რომ ეს იყო აბსოლუტური ფორმალობა ამიტომ, როგორც ჩანს, საქართველოს პრეზიდენტს უკვე გადაწყვეტილი ჰქონდა ვის წარადგენდა. აქედან გამომდინარე, ჩვენ არ ჩავთვალეთ საჭიროდ რომ მონაწილეობა მიგვეღო ამ პროცესში, მაგრამ მიუხედავად ამისა, ჩვენ მაინც მოვუწოდებთ მას, რომ მაქსიმალურად დამოუკიდებელი კანდიდატის შერჩევა მოახდინოს,"- აცხადებს არასამთავრობო ორგანიზაცია ”საერთაშორისო გამჭვირვალობა - საქართველოს” აღმასრულებელი დირექტორი ეკა გიგაური.

”სამართლიანი არჩევნებისა და დემოკრატიის საერთაშორისო საზოგადოების” აღმასრულებელი დირექტორი მიხეილ ბენიძეც ეხმაურება აღნიშნულ საკითხს და აცხადებს, რომ პრეზიდენტთან შეხვედრაზე მიწვევა ორი სამი საათით ადრე მიიღო და მისვლა ვერ მოახერხა:

"მიწვევა ნამდვილად მივიღეთ, უბრალოდ ეს იყო რაღაც ეს ემ ეს კომუნიკაციის სახით ორი-სამი საათით ადრე შეხვედრამდე, ფიზიკურად ვერ მოხერხდა, რომ ამ შეხვედრაზე ვყოფილიყავით, თუმცა, როგორც ვნახეთ, თავად შეხვედრა იყო იქ ჩვენი პარტნიორი არასამთავრობო ორგანიზაციის წარმომადგენელი, სამწუხაროდ შეხვედრაც არ იყო ძალიან საქმიანი და ფორმალურ ხასიათს უფრო ატარებდა,"-ამბობს მიხეილ ბენიძე.