უკავშირებს თუ არა ქუმსიშვილი მის წინააღმდეგ დაწყებულ გამოძიებას ივანიშვილს - მთავრობიდან სკანდალით გაშვებული ეკონომიკის მინისტრი კამერების წინ გამოჩნდა

პოლიტიკა - 11:59, 21 Dec, 2018

1082

ეკონომიკისა და ფინანსთა ყოფილი მინისტრი, დიმიტრი ქუმსიშვილი, რომლის წინააღმდეგაც პროკურატურაში გამოძიებაა დაწყებული, სკანდალის შემდეგ საზოგადოებაში პირველად გამოჩნდა.

ყოფილი მაღალჩინოსანი არ აკონკრეტებს, რა კითხვები ჰქონდა მასთან პროკურატურას და რატომ მოუწია საგამოძიებო უწყებაში რამდენჯერმე მისვლა.

ქუმსიშვილის განცხადებით, დიდი ოდენობით საბიუჯეტო თანხების მითვისება-გაფლანგვის ფაქტებზე დაწყებული გამოძიება აღარ არის აქტუალური.

„ერთხელ მქონდა კომუნიკაცია და ამის შესახებ ყველამ იცით. ეს იყო ივნისის ბოლოს. დღეს არ არის თემა აქტუალური და ჩემი გადმოსახედიდან, არც მაშინ უნდა ყოფილიყო. პროგრამებთან დაკავშირებით არც მაშინ ყოფილა კითხვები და არც დღეს არ არის. დარწმუნებული ვარ, პროგრამები მათ შორის „აწარმოე საქართველოში“ არის ერთ-ერთი წარმატებული და სწორი პროგრამა. სტარტაპებზე საერთოდ არ ყოფილა არანაირი კითხვები, არც „აწარმოე საქართველოს“ მიმართ“, - განაცხადა ქუმსიშვილმა.

ჟურნალისტები დაინტერესდნან, მისი სამინისტროს საქმიანობის შესწავლა ხომ არ იყო ბიძინა ივანიშვილისგან პოლიტიკური დევნა, რადგან ის კვირიკაშვილის მთავრობის წევრი იყო, თუმცა ამაზე ყოფილმა მაღალჩინოსანმა საუბარი არ ისურვა.

" მე პოლიტიკიდან წავიდი... მგონია, რომ არავინ არ მერჩის" - თქვა მან.

საუბარია 2018 წლის მარტიდან მიმდინარე გამოძიებაზე. გამოძიება ეკონომიკის სამინისტროსა და რეგიონული განვითარების სამინისტროს ცალკეულ მოხელეთა მხრიდან სამსახურებრივი უფლებამოსილების ბოროტად გამოყენებისა და დიდი ოდენობით საბიუჯეტო თანხების მითვისება-გაფლანგვის ფაქტებზე მიმდინარეობს.