უსაფრთხოების საბჭო უშიშროების საბჭოს ნაცვლად - პარლამენტში კანონპროექტის განხილვა მიმდინარეობს

პოლიტიკა - 10:11, 21 Dec, 2018

962

საქართველოს ახლადარჩეული პრეზიდენტის მიერ ფიცის დადების შემდეგ, ქვეყანაში ახალი კონსტიტუციური მოდელი ამოქმედდა, რომელიც ითვალისწინებს პრეზიდენტის სათათბირო ორგანოს, ეროვნული უშიშროების საბჭოს გაუქმებას.

პარლამენტში შესულია კანონპროექტი რომელიც, როგორც განმარტებით ბარათშია ნათქვამი ემსახურება იმ ინსტიტუციური ვაკუუმის შევსებას, რომელიც ეროვნული უსაფრთხოების პოლიტიკის დაგეგმვისა და კოორდინაციის სფეროში, სტრატეგიულ დონეზე შეიქმნა,

არსებული კანონმდებლობით, ეროვნული უსაფრთხოების პოლიტიკის მაკოორდინირებელ ერთადერთ ორგანოდ რჩება მხოლოდ საქართველოს მთავრობა და ახალი კანონპროექტიც საქართველოს პრემიერ-მინისტრის სათათბირო ორგანოს- ეროვნული უსაფრთხოების საბჭოს ჩამოყალიბებას ითვალისწინებს.

„საბჭოს მუდმივ წევრებად იმ თანამდებობის პირების განსაზღვრა იგეგმება, რომლებსაც პირდაპირი/ირიბი შეხება აქვთ უსაფრთხოების საკითხებთან. თუმცა პრემიერ-მინისტრის გადაწყვეტილებით, საბჭოს სხდომაზე შეიძლება მოწვეულ იქნენ სხვა პირებიც, მაგ. სახელმწიფო უწყებების ხელმძღვანელები, შესაბამისი დარგის ექსპერტები, სპეციალისტები და ა.შ. შინაარსობრივად, საბჭო (მისი აპარატით) არის პრემიერ-მინისტრთან არსებული ანალიტიკური ცენტრი, რომელიც სტრატეგიულ დონეზე პოლიტიკის დაგეგმვის მანდატით აღიჭურვება, თუმცა არ აქვს ოპერაციულ დონეზე ფუნქციონირების უფლებამოსილება. საბჭოს მანდატი ითვალისწინებს უსაფრთხოების საკითხებზე მომუშავე უწყებების კოორდინაციას.“- აღნიშნულია განმარტებით ბარათში.

ინიციატივას პარლამენტის იურიდიულ საკითხთა კომიტეტში განიხილავენ. ოპოზიცია ამბობს, რომ ცვლილებები რეალური შედეგის მომტანი ვერ იქნება, რადგან უკვე დიდი ხანია ეს საბჭო უფუნქციოდ არის დარჩენილი. ეს კი საფრთხეს უქმნის ქვეყნის ინტერესებს.

„არანაირი გადამწყვეტი მნიშვნელობა არ აქვს ვის დაქვემდებარებაში იქნება უშიშროების საბჭო. იმიტომ, რომ ჩვენ გვაქვს ვითარება, როდესაც არის პრეზიდენტი, რომელსაც არ აქვს დემოკრატიული მანდატი და რომელიც საკუთარ ჯარს, მშვიდობიანი მოსახლეობის დაბომბვას აბრალებს, პირდაპირ რუსულ ნარატივთან ერთიანობაში. ჩვენ გვყავს პრემიერ-მინისტრი, რომელიც რეალურად პრემიერ-მინისტრი არ არის და მას ჰყავს უფროსი ბიძინა ივანიშვილის სახით.“ - განაცხადა „ევროპული საქართველოს“ წევრმა ოთარ კახიძემ.