"ანანიაშვილის შესახებ ჩემი განცხადება საინფორმაციო საშუალებებმა არასწორად და დაუშვებელ კონტექსტში გაავრცელეს"- დავით ოქიტაშვილი

პოლიტიკა - 17:03, 20 Dec, 2018

6849

საქართველოს კულტურის პალატის პრეზიდენტი, ოპერის საბალეტო დასის ხელმძღვანელის თანამდებობიდან ნინო ანანიაშვილის გადადგომის შესახებ მედიაში გავრცელებულ ინფორმაციას ეხმაურება. დავით ოქიტაშვილის თქმით, საინფორმაციო საშუალებებმა ნინო ანანიაშვილზე მისი განცხადება არასწორ კონტექსტში გაავრცელეს.
"ზოგიერთმა საინფორმაციო საშუალებებმა არასწორად და სრულიად დაუშვებელ კონტექსტში გაავრცელეს ჩემი დღევანდელი განცხადება. ნინო ანანიაშვილი არის მსოფლიო დონის პრიმა-ბალერინა და მისი, როგორც პროფესიონალის მოღვაწეობა ქართული ბალეტისთვის უდაოდ მნიშვნელოვანი და წარმატებულია. მე ვისაუბრე ქალბატონი ნინოს მეუღლე გრიგოლ ვაშაძის განცხადებაზე, რომელშიც ის დღევანდელ ხელისუფლებას კრიმინალურს უწოდებს და დამხობისაკენ მოუწოდებს მოსახლეობას!ამ დროს ქალბატონი ნინო არის საბალეტო დასის ხელმძღვანელი, იმ საბალეტო დასის, რომელიც თავისუფალი უნდა იყოს ყოველგვარი პოლიტიკისგან ისევე, როგორც ხელოვნების და კულტურის ყველა ორგანიზაცია"-წერს ოქიტაშვილი სოციალურ ქსელში.

დღეს, მედიაში გავრცელებული ინფორმაციით, დავით ოქირაშვილი საბალეტო დასის ხელმძღვანელის თანამდებობიდან ნინო ანანიაშვილის გადადგომას ითხოვდა და ამ მოთხოვნით ხელოვნების, მასმედიისა და სპორტის პროფკავშირთან ერთად, ორშაბათიდან პერმანენტულ აქციები დააანონსა. დავით ოქიტაშვილის თქმით, ოპერისა და ბალეტის თეატრში ნეპოტიზმია და ბევრ ცნობილ და ნიჭიერ ხელოვანს თეატრს არც კი აკარებენ