"დავით კირკიტაძისთვის ვიბრძოლებთ, ერთი წუთი არ დავნებდებით და არ გავაჩერებთ მას საპატიმროში"-გრიგოლ ვაშაძე

პოლიტიკა - 21:41, 19 Dec, 2018

1425

დავით კირკიტაძისთვის აღკვეთის ღონისძიების შეფარდებაზე გურჯაანის სასამართლო ხვალ დილით, 10:30 საათზე იმსჯელებს. სასამართლოსთან დილიდან გამოცხადებულია ოპოზიციის მობილიზება. "ძალა ერთობაშია" -ს წევრები ამბობენ, რომ დავით კირკიტაძე პოლიტიკური ნიშნით არის დაკავებული. გაერთიანებული ოპოზიცია თანაგუნდელი გათავისუფლებას მოითხოვს.

„ისინი ფიქრობენ, რომ ხვალ დილით ამდენი ვერ ვიქნებით, რაღაც პრობლემა გვექნება, შეიძლება ვერ შევიკრიბოთ. ამიტომ ჩვენი გადაწყვეტილება არის, რომ ხვალ დილით 9 საათზე ყველანი ვიკრიბებით აქ, გურჯაანის სასამართლოსთან და აქ შევხვდებით ჩვენს ღირსეულ თანამებრძოლს დავით კირკიტაძეს და ბოლომდე დავუჭერთ მხარს,“-განაცხადა გიორგი ვაშაძემ.

გაერთიანებული ოპოზიციის ლიდერები ამბობენ, რომ დავით კირკიტაძის გასათავისუფლებლად ყველაფერს გააკეთებენ.

„იმედი აქვთ, რომ ხვალ ხალხი არ შეიკრიბება. ხალხი ხვალ შეიკრიბება და ყველა დაველოდებით სასამართლოს განჩინებას. ერთი რამ უნდა ახსოვდეს ამ ხელისუფლებას, რომ არაფერი არ დამთავრდება არც დღეს, არც ხვალ. დავით კირკიტაძისთვის ცალკე იბრძოლებს ჩვენი იურისტების ჯგუფი, ცალკე იბრძოლებს გაერთიანებული ოპოზიცია. ერთი წუთი არ დავნებდებით და არ გავაჩერებთ მას საპატიმროში,“- განაცხადა გრიგოლ ვაშაძემ.

დავით კირკიტაძეს ბრალი სისხლის სამართლის კოდექსის 353-ე პრიმა მუხლით წაუყენეს, რაც პოლიციელზე თავდასხმას, ფიზიკური შეურაცხყოფასა და ქონების დაზიანებას გულისხმობს. პროკურატურა აღკვეთის ღონისძიების სახედ პატიმრობის გამოყენებას ითხოვს.

დავით კირკიტაძე ბრალს არ აღიარებს და მშრალი შიმშილობა აქვს გამოცხადებული.