საქართველოდან თავშესაფრის მაძიებელთა რიცხვის ზრდის გამო ევროკომისია შეშფოთებას გამოთქვამს

პოლიტიკა - 19:20, 19 Dec, 2018

1423

ვროკომისიის ყოველწლიური ანგარიში, რომელიც დასავლეთ ბალკანეთისა და „აღმოსავლეთ პარტნიორობის“ პროგრამის წევრი ქვეყნების მიერ უვიზო მიმოსვლისთვის დადგენილი მოთხოვნების შესრულებას აფასებს, ევროკომისიის ვებგვერდზე გამოქვეყნდა.

ევორკომისიის ანგარიშში ნათქვამია, რომ საერთო ჯამში გრძელდება სავიზო რეჟიმის ლიბერალიზაციის მოთხოვნების შესრულება. თუმცა, მიუხედავად იმისა, რომ მიღებული იყო კონკრეტული ზომები არალეგალურ მიგრაციასთან დაკავშირებული გამოწვევების მოსაგვარებლად, საჭიროა დაუყოვნებლივი შემდგომი ქმედებები არსებული პრობლემების გადასაჭრელად, არსებულ პრობლემებს შორის არის თავშესაფრის მოთხოვნის უსაფუძვლო განაცხადების გაზრდილი რაოდენობაც.

პრესრელიზში ნათქვამია, რომ ევროკავშირთან უვიზო რეჟიმის მქონე რვავე ქვეყანამ და მათ შორის საქართველომაც გასულ წელს მიიღო ზომები უკანონო მიგრაციის წინააღმდეგ, თუმცა მდგრადი შედეგების მისაღწევად მეტია გასაკეთებელი.

ევროკომისიის ანგარიშში შეშფოთებაა გამოთქმული საქართველოსა და მოლდოვის მოქალაქეების მხრიდან თავშესაფრის მოთხოვნით უსაფუძვლო განაცხადებების რიცხვის ზრდის გამო.

„საქართველოსა და მოლდოვის მოქალაქეების მხრიდან თავშესაფრის მოთხოვნით უსაფუძვლო განაცხადების რიცხვის ზრდა შემაშფოთებელია“, – ნათქვამია ევროკომისიის პრესრელიზში

ანგარიშის მიხედვით, 2018 წლის პირველ ნახევარში წინა წლის იმავე პერიოდთან შედარებით საქართველოს მოქალაქეების მიერ თავშესაფრის მოთხოვნაზე განაცხადთა რაოდენობა გაორმაგდა.

კერძოდ, ამ მოთხოვნით 2018 წლის პირველ ნახევარში განაცხადი 9 680-მა ადამიანმა გააკეთა, 2017 წლის ანალოგიურ პერიოდში კი მათი რიცხვი 4 770 იყო. ანგარიშში ნათქვამია, რომ ძირითადად ეს ზრდა გერმანიასა და საფრანგეთს შეეხო. ანგარიშში ასევე ნათქვამია, რომ გაიზარდა შესვლაზე უარის და უკანონო დარჩენის მაჩვენებელი და საგრძნობლად შემცირდა თავშესაფრის მინიჭების მაჩვენებელი.

„თავშესაფრის მინიჭების მაჩვენებელი 2016 წელს იყო 14,09% და 2017 წელს – 5,48%, რაც მნიშვნელოვან შემცირებას გვაჩვენებს. საქართველოს თანამშრომლობა რეადმისიასა და დაბრუნებასთან დაკავშირებით კარგად მიმდინარეობს და უნდა გაგრძელდეს.“- ნათქვამია ანგარიშში.