გაერთიანებული ოპოზიციის ლიდერები და მხარდამჭერები გურჯაანის სასამართლოს წინ დავით კირკიტაძის დაკავებას აპროტესტებენ. ერთიანი ნაციონალური მოძრაობის წევრის მურთაზ ზოდელავას თქმით, დავით კირკიტაძე პოლიტიკური პატიმარია და ისინი მის დაუყოვნებლივ გათავისუფლებას ითხოვენ. ზოდელავას თქმით, იმ საკანში სადაც ახლა დავით კირკიტაძე ჰყავთ, ის ადამიანები უნდა ისხდნენ, რომლებმაც არჩევნები ტოტალურად გააყალბეს. ზოდელავას განცხადებით, ოპოზიცია პროტესტს გააგრძელებს და იქნება მუდმივი პრესინგი ხელისუფლებაზე:

„იქნება მუდმივი პრესინგი ხელისუფლებაზე, არავინ არ აპირებს თავის შეკავებას იმაზე, რომ ახალი წელია. ჩვენ ვითხოვთ დაუყოვნებლივ იქნას გათავისუფლებული პოლიტიკური პატიმარი დავით კირკიტაძე და დაუყოვნებლივ იქნენ პასუხისგებაში მიცემული ამ ხელისუფლების დამქაშები, რომლებმაც განახორციელეს დანაშაულები ბოლო დღეების განმავლობაში და არჩევნების დღეს. განსაკუთრებით გაყალბების ფაქტებზე, რომლებიც იქნა დადასტურებული ვიდეომტკიცებულებებით და რომელსაც საზოგადოება გაეცნო, ამ ვიდეომტკიცებულებებში მარტივადაა შესაძლებელი ადამიანების და დანაშაულების იდენტიფიცირება. დაუყოვნებლივ უნდა იქნეს გათავისუფლებული დავით კირკიტაძე და ზუსტად იმავე საკანში სადაც ახლა ყავთ დამწყვდეული დათო უნდა შესახლდნენ კომისიის ქოცი წევრები რომლებიც აყალბებდნენ ხელმოწერებს და ატრიალებდნენ კარუსელს. დავით კირკიტაძე იყო ლიდერი, რომელმაც პირველ და მეორე ტურში დაამარცხა ხელისუფლება, მიუხედავად ტოტალური გაყალბებისა და ფულის ცუნამისა. თქვენ იცით, რომ ინკასატორების მეშვეობით ჩამოქონდათ ქეში ფული, რომ დემოკრატიის წინააღმდეგ ემუშავებინათ. ამაზე გაღიზიანდა ივანიშვილი და მიიღო ეს გადაწყვეტილება. “- განაცხადა მურთაზ ზოდელავამ, მისი თქმით ოპოზიცია პროტესტს განაგრძობს ყველა რაიონში და ყველა მიმართულებით:

„ქართული ოცნება ვერ იქნება ტკბობაში, ისინი ვერ მოახერხებენ, რომ დავარცხნონ სიტუაცია საქართველოში“- აღნიშნა მურთაზ ზოდელავამ.