"კირკიტაძე კლასიკური გაგებით პოლიტიკური პატიმარია, ქართველი ხალხი აუცილებლად აღადგენს იმ დემოკრატიას, რომელიც მოსპო ივანიშვილმა"- ბაჩუკი ქარდავა

პოლიტიკა - 12:34, 19 Dec, 2018

992

გურჯაანის რაიონულ სასამართლოსთან, ამ წუთებში გაერთიანებული ოპოზიციის ლიდერები და მხარდამჭერები, არიან შეკრებილები, ისინი კირკიტაძის გათავისუფლებას მოითხოვენ და აცხადებენ, რომ პოლიტიკოსი პატიმრობაში უკანონოდ იმყოფება:

„დავით კირკიტაძე არის კლასიკური გაგებით პოლიტიკური პატიმარი, ის პოლიტიკური საქმიანობის გამო არის ამ წუთში დაკავებული და ბუნებრივია, ჩვენ ყველაფერს გავაკეთებთ, რომ რამენაირად მოვახერხოთ ბიძინა ივანიშვილი დავაბრუნოთ კანონიერ პოლიტიკურ ჩარჩოებში და თუ ეს ვერ მოხერხდება, ყველამ უნდა იცოდეს და ამაზე ენისმოჩლექით არ უნდა ვილაპარაკოთ, ქართველი ხალხი აუცილებლად შეეცდება, ქვეყანაში აღადგინოს ჩანასახში არსებული დემოკრატია, რომელიც მოსპო ბიძინა ივანიშვილმა“, - განაცხადა ეროვნულ-დემოკრატიული პარტიის ლიდერმა ბაჩუკი ქარდავამ.

მისივე თქმით, ავტობუსი, რომლის შუშის ჩამტვრევასაც ედავებიან კირკიტაძეს, აქციის მონაწილეებს გამოხატვის თავისუფლებას უზღუდავდა და სწორედ ეს არის კანონდარღვევა:

„იმ ავტობუსს არანაირი საიდენტიფიკაციო ნიშანი არ ჰქონია, ის ავტობუსი უკანონოდ გვიხერგავდა გზას და იყო უკანონო ბარიკადი, იმ მანიფესტაციის წინააღმდეგ, რომელიც მიემართებოდა მშვიდობიანი, კონსტიტუციური უფლების გამოსახატავად, ამიტომ ეს იყო კანონდარღვევა და არა ის, რასაც ვაკეთებდით ჩვენ.

გაერთიანებული ოპოზიციის „ძალა ერთობაშიას“ ერთ-ერთი ლიდერის დავით კირკიტაძის აღკვეთის ღონსიძიების სახეზე გურჯაანის რაიონული სასამართლო დღეს იმსჯელებს.