თბილისის საკრებულოს სხდომა მწვავე პოლიტიკური განცხადებებით გაიხსნა, რის შედეგადაც ფრაქცია „ევროპული საქართველოს“ წევრებმა სხდომა პროტესტის ნიშნად დატოვეს. მათი ბოიკოტი ბოლო დღეებში განვითარებულ მოვლენებს უკავშირდება, მათ შორის გაერთიანებული ოპოზიციის ერთ-ერთი ლიდერის, დავით კირკიტაძის დაკავებას:

„ხელისუფლება ვერ ხედავს პრობლემებს, მას ჰგონია, რომ პრობლემა აქვს მცირე ოპოზიციურ ჯგუფთან. ჯერ მცირე როგორ არის, როდესაც ქვეყანა, ამ სიტყვის სრული მნიშვნელობით, არის გაყოფილი შუაზე. ქვეყნის ნახევარი არის თქვენი ოპონენტი. იმის მაგივრად, რომ ხდებოდეს ამის ანალიზი, ხდებოდეს ნაბიჯების გადადგმა იქითკენ, რასაც ხალხი ითხოვს იმიტომ, რომ თქვენი პრობლემა არა პოლიტიკური ოპონენტები, არამედ ხალხია. ამის მაგივრად წარმოდგენილი ისევ იგივე მიმართულების ბიუჯეტი და რა თქმა უნდა, ამ დღეებში ამაზე მსჯელობა იქნება, სადაც სოციალური ხარჯები, მაგალითად, ისეთი მწვავე საკითხები, როგორიც არის ავარიული სახლები, როგორიც არის სოციალური სასადილოები არის დაკლებული. ხელისუფლებას არანაირი დასკვნები მთელი ამ 2-3 თვის პროცესებიდან არ გამოუტანია, რაც ძალიან სამწუხაროა. ერთადერთი მნიშვნელოვანი საკითხი, რომელიც ჩვენ წინ გველის, ალბათ, იქნება ბიუჯეტის განხილვა. მაშინ შემოგიერთდებით, ახლა კი დაგტოვებთ, რომ ეს რიგითი მიმდინარე საკითხები უჩვენოდ განიხილოთ,“ - განაცხადა გიორგი გაბაშვილმა.