ხორავას ქუჩაზე მოკლული დავით სარალიძის მამამ ზაზა სარალიძემ შინაგან საქმეთა სამინისტროს შენობა დატოვა. სარალიძემ საგამოძიებო უწყებაში რამდენიმე საათი გაატარა. მას ახალი გამოძიების შედეგები და მოპოვებული ახალი მტკიცებულებები გააცნეს. მისივე თქმით, შესაძლოა უახლოეს პერიოდში მისი შვილის მკვლელობის საქმეზე რამდენიმე პირი დააკავონ:

„დღის წესრიგში დგას კონკრეტული პირების დაკავების საკითხი, მაგრამ არ ვიცი, რატომ იკავებენ თავს, რა ხდება. მაგრამ რომ ჩავალ ბოლომდე, გადავიკითხავ საქმის მასალებს, უკვე კონკრეტულ კითხვებს დავსვამ. მე არ განვიხილავ მხოლოდ და მხოლოდ კალანდიას საკითხს, მე განვიხილავ ყველა ადამიანის საკითხს, ვინც შემხებლობაში იყო ამ საქმესთან და ნებისმიერი, ის პროკურორი იქნება, თუ გამომძიებელი იქნება, თუ ვინც კი დანაშაული ჩაიდინა ამ საქმის გაყალბებაში, ყველა უნდა იყოს პასუხისგებაში მიცემული,“ - განაცხადა ზაზა სარალიძემ.