ხმაურია თბილისის საკრებულოს სხდომაზე - ფრაქცია "ევროპული საქართველოს" წევრებმა სხდომა პროტესტის ნიშნად დატოვეს.

სახდომის დაწყებამდე გოკა გაბაშვილმა განაცხადა, რომ ხელისუფლება სათანადოდ ვერ აცნობიერებს, თუ რა მოხდა ბოლო 2-3 თვის განმავლობაში ქვეყანაში.

"მილიონამდე ადამიანმა ქვეყანაში ამ ხელისუფლების წინააღმდეგ მისცა ხმა. მილიონამდე ადამიანმა გამოუცხადა უარი ამ ხელისუფლებას და ეს დასკვნები გამოტანილი არ არის. ოპოზიციის ნაწილი სხდომაზე საკითხების განხილვას დღეს ვერ ესწრება და ამის პასუხისმგებლობა აქვს ხელისუფლებას, რომ შექმნა ასეთი კლიმატი ქვეყანაში...

ხელისუფლება ვერ ხედავს პრობლემებს. მას ჰგონია, რომ პრობლემა აქვს მცირე ოპოზიციურ ჯგუფთან. მცირე როგორ არის, როცა ქვეყანა გაყოფილია შუაზე. ქვეყნის ნახევარი არის თქვენი ოპონენტი. იმის ნაცვლად, რომ ხდებოდეს ნაბიჯების გადადგმა იქითკენ, რასაც ხალხი ითხოვს, ნაცვლად ამისა, წარმოდგენილია იგივე მიმართულების ბიუჯეტი.

2-3 თვის განმავლობაში მიმდინარე მოვლენებიდან ხელისუფლებას დასკვნები არ გამოუტანია, რაც ძალიან სამწუხაროა. ერთადერთი მნიშვნელოვანი საკითხი, რაც წინ გველის, ალბათ, ბიუჯეტის განხილვა იქნება. მაშინ შემოგიერთდებით", - განაცხადა გოკა გაბაშვილმა და სხდომა დატოვა.