"თავისუფლება პოლიტპატიმარს! ივანიშვილმა პოლიტიკური რეპრესიები დაიწყო!" - გაერთიანებული ოპოზიციის აქცია დროებითი დაკავების იზოლატორთან (ვიდეო)

პოლიტიკა - 23:02, 17 Dec, 2018

1737

გვიან საღამოს მშვიდობიანი აქცია გაიმართა თელავში, დროებითი დაკავების იზოლატორთან, სადაც გაერთიანებული ოპოზიციის ერთ-ერთი ლიდერი დავით კირკიტაძეა მოთავსებული.
ოპოზიციის ლიდერების თქმით, ივანიშვილმა პოლიტიკური რეპრესიები დაიწყო.

ენმ-ის პოლიტსაბჭოს წევრი იმ დროს დააკავეს, როცა კახეთში გაერთიანებული ოპოზიციის ლიდერები ნიკა მელია, ბაჩუკი ქარდავა, გიორგი ბოტკოველი და დავით კირკიტაძე, გუშინ აქციაზე ნაცემი მხარდამჭერის მოსანახულებლად იყვნენ ჩასული, რომელსაც ოპერაცია ჩაუტარდა. ოპოზიციის ლიდერების თქმით, მთელი დღის განმავლობაში მათ სუს-ის წარმომადგენლები უთვალთვალებდნენ, რაც მათ მიერ ვიდეო კადრებით იქნა დაფიქსირებული. მას შემდეგ რაც ოპოზიციის ლიდერებმა ისინი ამხილეს, ადგილზე მივიდნენ სამართალდამცავები, დავით კირკიტაძე მანქანიდან გადმოიყვანეს და დააკავეს.
გაერთიანებული ოპოზიციის ლიდერმა, დავით კირკიტაძემ წინასწარი მოთავსების იზოლატორში პროტესტის ნიშნად შიმშილობა დაიაყო. ამის შესახებ განცხადება კირკიტაძის ადვოკატმა გააკეთა.

მისი თქმით, დაკავებული ბრალდებას არ ეთანხმება.