ველისციხეში განვითარებული მოვლენები - სახალხო დამცველი გაერთიანებული ოპოზიციის ლიდერებს შეხვდა

პოლიტიკა - 19:27, 17 Dec, 2018

939

საქართველოს სახალხო დამცველი ნინო ლომჯარია გაერთიანებული ოპოზიციის „ძალა ერთობაშია“ ლიდერებს გრიგოლ ვაშაძეს და თინათინ ბოკუჩავას შეხვდა. ოპოზიციის ლიდერების ინიციატივით გამართულ შეხვედრაზე საუბარი შეეხო 16 დეკემბერს, საქართველოს პრეზიდენტის ინაუგურაციის პარალელურად გამართულ საპროტესტო აქციას და ოპოზიციის მიერ სამომავლოდ დაგეგმილ მანიფესტაციებს.

სახალხო დამცველმა ოპოზიციას მოუწოდა საპროტესტო აქციების დროს მაქსიმალურად იყოს დაცული შეკრებისა და მანიფესტაციების მშვიდობიანი ფორმები. ნინო ლომჯარია ასევე მიმართავს შინაგან საქმეთა სამინისტროს, გაატაროს ყველა შესაძლო ზომა მშვიდობიანი შეკრებისა და გამოხატვის უფლების რეალიზაციისთვის.

„როდესაც ქვეყანაში მაღალია პოლიტიკური ტემპერატურა და შექმნილია დაძაბული ფონი, ძალიან მნიშვნელოვანია პოლიტიკური პარტიის ლიდერებმა აიღონ პასუხისმგებლობა აქციების მშვიდობიან განვითარებაზე, ჩემს პოზიციას იზიარებს გრიგოლ ვაშაძეც და როგორც თავად აცხადებს ემხრობა მხოლოდ სამართლებრივ გზას.

რაც შეეხება გუშინ ველისციხეში განვითარებულ მოვლენებს, კიდევ ერთხელ აღვნიშნავ, რომ აუცილებელია ოპოზიციასა და სამართალდამცველებს შორის მოხდეს დროული კომუნიკაცია და ინფორმირება, რათა ავირიდოთ დაპირისპირების ესკალაცია და მსგავსი ინციდენტები, რაც ჩვენ გუშინ ყველამ ერთად ვიხილეთ თავიდან იქნას აცილებული“- განაცხადა ნინო ლომჯარიამ ჟურნალისტებთან.

სახალხო დამცველმა, ასევე, მოუწოდა შინაგან საქმეთა სამინისტროს, აქციის მონაწილეებისა და პოლიციელების ფიზიკური ანგარიშსწორების ფაქტებზე წარმართოს ობიექტური და მიუკერძოებელი გამოძიება.

სახალხო დამცველის აპარატი დეტალურად შეისწავლის 16 დეკემბერს ოპოზიციის აქციაზე განვითარებულ მოვლენებს და კომპეტენციის ფარგლებში მოახდენს რეაგირებას. ასევე სახალხო დამცველის აპარატი მანდატის ფარგლებში მონიტორინგს გაუწევს ოპოზიციის მიერ დაგეგმილ აქციებს.

შეხვედრის დასრულების შემდეგ განცხადება გააკეთა გრიგოლ ვაშაძემაც. მისი თქმით, საუბარი შეეხებოდა ქვეყანაში შექმნილ მდგომარეობას და იმ ინციდენტს, რომელსაც ადგილი ჰქონდა სოფელ ველისციხეში.

„ძალიან ბევრ საკითხზე გვქონდა თანხვედრა. ქალბატონ ნინოს რამდენიმე რჩევა და მოსაზრება ჰქონდა, რაც ყურადღებით მოვისმინე და გავითვალისწინებთ. და საერთოდ ყველამ უნდა ვეცადოთ, ვისწავლოთ ერთ სახელმწიფოში ცხოვრება და მინდა, რომ ხელისუფლებამ ეს, რაც შეიძლება სწრაფად გაიგოს,“- განაცხადა გრიგოლ ვაშაძემ.