"ამ სამკვდრო-სასიცოცხლო ომიდან გამოსავალი არის მხოლოდ პროპორციული საპარლამენტო არჩევნები"- გიგი უგულავა ოპოზიციის საერთო მიზნებზე საუბრობს

პოლიტიკა - 16:00, 17 Dec, 2018

901

ევროპული საქართველოს ლიდერმა გიგი უგულავამ დღეს გამართულ ბრიფინგზე პროპორციულ საარჩევნო სისტემაზე გადასვლის აუცილებლობაზე ისაუბრა და განაცხადა, რომ ეს არის ერთადერთი გზა, რომელიც ქვეყანას კრიზისიდან გამოსვლაში დაეხმარება. უგულავას თქმით, ხელისუფლებამ უნდა გააცნობიეროს, რომ ბიძინა ივანიშვილის წინააღმდეგ ხმა 900 ათასმა ადამიანმა მისცა.

„ამ არჩევნებმა, განსაკუთრებით მეორე ტურმა პოლიტიკური სიმძიმის ცენტრი აბსოლუტურად სხვა მიმართულებით გადაიტანა. ხელისუფლებამ ეს უნდა გააცნობიეროს რომ 900 ათასმა ადამიანმა ბიძინა ივანიშვილის წინააღმდეგ მისცა ხმა. ეს არის ძალიან დიდი რაოდენობა ადამიანებისა, რომლებიც ამბობენ რომ ყველაფერზე ვართ თანახმა, ოღონდ ხელისუფლებაში აღარ იყოს ბიძინა ივანიშვილი. ამის პასუხი და ამის გამოსწორების ერთადერთი საშუალება არსებობს, ეს არის პროპორციული არჩევნები. ეს არის თემა, რომელზეც თანხმდება მთელი ოპოზიცია, რომელზეც თანახმაა ყველა არასამთავრობო ორგანიზაცია, ეს არის თემა რაზეც მთელი საზოგადოება თანხმდება, მინუს „ქართული ოცნება.“ ამიტომ, "ევროპული საქართველოს" აზრი და პოზიცია მდგომარეობს სწორედ ამაში, რომ დღეს ჩვენ , ყველა ოპოზიციური პარტია, დიახ, ჩვენი საზოგადოების დაკვეთა არის ოპოზიციური კოორდინაცია. საზოგადობა ხედავს ოპოზიციურ პარტიებს შორის განსხვავებებს, მაგრამ ამავდროულად გვეუბნება, დაჯექით, მოილაპარაკეთ და იყავით კოორდინაციაში, მოიფიქრეთ ახალი ფორმები, მათ შორის რადიკალური ბრძოლის იმისათვის, რომ შედეგი დადგეს, შედეგი კი არის პროპორციული არჩევნები, ეს არის თემა რომელიც გამოიყვანს ქვეყანას კრიზისიდან. რაც უფრო გაწელავს ხელისუფლება დროს, რაც უფრო მეტი რეპრესიები წავა და ძალადობის სპირალში შევა ქართული ოცნება, მით უფრო დამძიმდება ქვეყნის მდგომარეობა. აბსოლუტურად მიუღებელია, რომ ხელისუფლება ცდილობს ტოლობის ნიშანი დასვას მასსა და ოპოზიციას შორის. პასუხისმგებელი ძალადობაზე და სიტუაციის რადიკალიზაციაზე ერთპიროვნულად არის ბიძინა ივანიშვილი და ქართული ოცნება, რომელმაც საზოგადოებას შესთავაზა ეს სამკვდრო-სასიცოცხლო ომი, საიდანაც გამოსავალი არის მხოლოდ და მხოლოდ პროპორციული საპარლამენტო არჩევნები. “ - განაცხადა გიგი უგულავამ.