გაერთიანებული ოპოზიციის გარკვეული ნაწილი თბილისში, რუსთაველის გამზირზე, პარლამენტის შენობასთან იკრიბებიან.

ისინი აპროეტსტებენ სალომე ზურაბიშვილის პრეზიდენტად დანიშვნას, ასევე იმ დაპირიპირებას, რომელიც კახეთის რეგიონში მოხდა.

ოპოზიციის ლიდერების განცხადებით, აღნიშნული აქცია არის სოციალური ქსელის მეშვეობით დაანონსებული.

აქციის მონაწილეების განცხადებით, აპროტესტებენ იმ ძალადობას, რაც მათ თანაგუნდელებსა და მხარდამჭერებზე დღეს მოხდა.

„ჩვენმა მოქალაქეებმა ნახეს, რომ არჩევნები მოგვპარეს. გუშინ ვნახეთ, რომ სალომე ზურაბიშვილი მემორიალთან მიიპარა. ნაცვლად იმისა, რომ ინაუგურაციის ფარგლებში მისულიყო იმიტომ, რომ იცოდა რომ იქ ოპოზიციის წარმომადგენლები არ მივცემდით მოღალატე სალომე ზურაბიშვილის მისვლის ნებას. დღეს ვნახეთ, რომ ფაქტობრივად თელავში შეიპარა ისე, რომ მშვიდობიან მომიტინგეებს არ მიეცათ საშუალებას არა თუ თელავში, არამედ გურჯაანშიც ვერ შევიდნენ. დღეს აქ სოციალური ქსელით დაანონსებული აქციაა. ადამიანებმა ვინც ვერ შეძლეს თელავში წასვლა, აქ ვაპროტესტებთ იმ უსამართლობას,რასაც რუსთავი 2-ში ვუყურეთ გუშინ,“- განაცხადა ენმ-ს წევრმა, ლევან ხაბეიშვილმა.

აქციაზე მივიდა სალომე სამადაშვილიც. მისი თქმით, ძალადობა გრძელდება.

„ძალადობა გრძელდება და ეს ინაუგურაციის პროცესი ფაქტობრივად დაიწყო ძალადობით ისევ საკუთარი მოქალაქეების წინააღმდეგ. მინდა საქართველოს ხელისუფლებას შევახსენო, რომ ძალადობა საკუთარი მოქალაქეების წინააღმდეგ ძალიან ცუდად მთავრდება და ძალიან ცუდად დამთავრდება ეს ბიძინა ივანიშვილისთვის,“- განაცხადა სალომე სამადაშვილმა.